తెలంగాణ: సోనియా విన్నారు, సుష్మా ఇస్తామన్నారు

By Pratap

Published: Thursday, March 29, 2012, 16:01 [IST]

న్యూఢిల్లీ: తెలంగాణ ఇవ్వాలని తాము చెప్పిన మాటలను తమ పార్టీ అధ్యక్షురాలు సోనియా గాంధీ జాగ్రత్తగా విన్నారని, తాము చెప్పిన సమాచారాన్ని నోట్ చేసుకున్నారని కాంగ్రెసు తెలంగాణ ప్రాంత పార్లమంెటు సభ్యులు చెప్పారు. కాంగ్రెసు తెలంగాణ ప్రాంత పార్లమెంటు సభ్యులు గురువారం సోనియా గాంధీని కలిశారు. తెలంగాణవాదం బలంగా ఉందని వారు చెప్పారు. తెలంగాణపై నిర్ణయం తీసుకునే దిశగా సోనియా వెళ్తున్నారని వారు చెప్పారు. తెలంగాణపై త్వరలోనే తమ పార్టీ అధిష్టానం స్పష్టత ఇస్తుందని వారు ధీమా వ్యక్తం చేశారు. తెలంగాణపై స్పష్టమైన వైఖరి చెప్పాలని, త్వరగా తెలంగాణ సమస్యకు పరిష్కారం చూపాలని తాము సోనియాను కోరినట్లు వారు తెలిపారు. తెలంగాణపై రేపు శుక్రవారం కూడా లోకసభను స్తంభింపజేస్తామని వారు చెప్పారు. పొన్నం ప్రభాకర్, జి. వివేక్, మధు యాష్కీ, మందా జగన్నాథం, రాజయ్య, కోమటిరెడ్డి రాజగోపాల్ రెడ్డి తదితరులు సోనియాను కలిసివారిలో ఉన్నారు.

కాగా, తాము అధికారంలోకి వచ్చిన వెంటనే తెలంగాణ రాష్ట్రాన్ని ఏర్పాటు చేస్తామని లోకసభలో బిజెపి పక్ష నేత సుష్మా స్వరాజ్ హామీ ఇచ్చారు. తెలంగాణ ప్రజల కల తప్పకుండా నెరవేరుతుందని ఆమె అన్నారు. తెలంగాణలోని ఆత్మహత్యలు తనను దిగ్భ్రాంతికి గురి చేస్తున్నాయని ఆమె అన్నారు. తెలంగాణ కోసం తమ పార్టీ పోరాడుతుందని ఆమె చెప్పారు. తెలంగాణకు ఆత్మహత్యలు పరిష్కారం కాదని ఆమె అన్నారు. తెలంగాణ ప్రజల మనోభావాలను తాము ఢిల్లీలో వినిపిస్తామని ఆమె చెప్పారు. ఆత్మహత్యలు చేసుకోవద్దని ఆమె తెలంగాణ యువతకు పిలుపునిచ్చారు. తనను కలిసిన తెలంగాణవాదులతో ఆమె మాట్లాడారు.

Published On March 29, 2012