వైయస్ టైమ్‌లోనూ అదే: పొంగులేటి, బాబుకు కౌంటర్

By Srinivas

Published: Sunday, April 8, 2012, 9:50 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి తులసి మొక్కో గంజాయి మొక్కో ప్రజలే తేలుస్తారని ఏఐసిసి కార్యదర్శి పొంగులేటి సుధాకర రెడ్డి శనివారం విమర్శించారు. జగన్ మొదట తన ఆస్తుల విషయంలో దర్యాఫ్తు జరుపుతున్న సిబిఐకి సహకరించి తన విశ్వసనీయత నిరూపించుకోవాలని సూచించారు.

దర్యాఫ్తు సంస్థలపై బురదజల్లే కార్యక్రమాన్ని ఆయన మానుకోవాలని హితవు పలికారు. కాంగ్రెసు పార్టీ అధిష్టానం ఢిల్లీ నుంచి రిమోట్ కంట్రోల్‌తో రాష్ట్ర ప్రభుత్వాన్ని నడిపిస్తోందని జగన్ విమర్శిస్తున్నారని, కానీ ఆయన తండ్రి, దివంగత ముఖ్యమంత్రి వైయస్ రాజశేఖర రెడ్డి సమయంలోనూ అదే జరిగిందన్నారు.

ఆయనకు అప్పుడు గుర్తుకు రాలేదా అని ప్రశ్నించారు.తమ పార్టీ జాతీయ పార్టీ అని, అందువల్లే రాష్ట్రంలోని పరిస్థితులను ఢిల్లీలో సమీక్షలు నిర్వహించడం సహజమేనన్నారు. ఢిల్లీలో రిమోట్ కంట్రోల్ అంటూ తెలుగుదేశం పార్టీ అధినేత నారా చంద్రబాబు నాయుడు కూడా అంటున్నారని ఎన్డీయే హయాంలో ఇక్కడి నుంచి రిమోట్ కంట్రోల్‌తో నియంత్రించింది బాబే అన్నారు.

Published On April 8, 2012