భార్య మార్కులతో భర్త ఉద్యోగం: రట్టు చేసిన సతీమణి

బెంగళూరు: భర్త తనను నిత్యం వేధిస్తుండటంతో ఓ భార్య తన మార్కులతో అతను ఉన్నతోద్యోగం సంపాదించిన విషయాన్ని వెలుగులోకి తీసుకు వచ్చింది. సదరు భర్త.. భార్య మార్కుల జాబితాపై తన పేరు వేసుకొని దర్జాగా ఉద్యోగాలు చేస్తుండటం విశేషం. ఈ విషయాన్ని భార్యే బయట పెట్టింది. దీంతో అతని గుట్టు రట్టయింది. ఇప్పుడు అతను జైలు పాలయ్యాడు.

అతడి భార్య లత ఇచ్చిన సమాచారంతో సాఫ్టువేర్ సంస్థలో ఉన్నతోద్యోగిగా పని చేస్తున్న నందన్ అనే ముప్పై మూడేళ్ల వ్యక్తిని చంద్రలేఔట్ పోలీసులు శనివారం అరెస్టు చేశారు. తన ఇంటర్, బికాం మార్కుల జాబితాల్లో పేర్లు మార్చుకొని పలు బహుళజాతి సంస్థల్ని మోసగించాడని ఆమె తన ఫిర్యాదులో పేర్కొంది.

పిహెచ్‌పి సంస్థలో 2005 నుండి 2008 వరకు, అమికార్ప్ సంస్థలో 2008 నుంచి 2011 వరకు పని చేసిన నందన్ ప్రస్తుతం ఐబిఎంలో డిప్యూటీ మేనేజర్‌గా పని చేస్తున్నాడు. ఏడాదికి రూ.24 లక్షల వేతనాన్ని పొందుతున్నాడు. ఇతడు పాలిటెక్నిక్ డిప్లోమా ఫెయిల్ అయ్యాడని పోలీసులు గుర్తించారు. భర్త వేధిస్తుండటంతోనే భార్య పోలీసులకు సమాచారం అందించిందని తెలుస్తోంది.

English summary

It was a double whammy for him. His wife stormed out of his life, and her act exposed his fraudulent education qualifications.