సిఎంతో విభేదాలు లేవన్నగల్లా: మంత్రి వరెస్స్ మంత్రి

విశాఖపట్నం: మఖ్యమంత్రి కిరణ్ కుమార్ రెడ్డికి తనకు ఎలాంటి విభేదాలు లేవని మంత్రి గల్లా అరుణ కుమారి గురువారం అన్నారు. విశాఖపట్నం వచ్చిన ఆమె మీడియాతో మాట్లాడారు. చిత్తూరు జిల్లాలోని బంగారు గనుల తవ్వకాలలో సిఎంకు తనకు ఎలాంటి మనస్పర్థలు లేవని, రాతి ఇసుక తయారీపై ఏర్పాటు చేసిన సదస్సును ప్రారంభించేందుకు తాను వచ్చినట్లు చెప్పారు. అరవై ఏళ్ల నుంచి తమ కుటుంబానికి, ముఖ్యమంత్రి కుటుంబానికి మంచి సంబంధాలు ఉన్నాయని, విభేదాలు మీడియా సృష్టి అన్నారు.

అనంతరం గల్లా అరుణ.. రాతి ఇసుక తయారీపై ఏర్పాటు చేసిన సదస్సును ప్రారంభించారు. ఈ సందర్భంగా గల్లా, మరో మంత్రి బాలరాజు మధ్య వాగ్వాదం చోటు చేసుకుంది. సమావేశంలో బాలరాజు మాట్లాడుతూ.. గిరిజనులపై కేసులు పెడుతున్నారని ఆగ్రహం వ్యక్తం చేశారు. ఇసుక తవ్వకాలపై గనుల శాఖ సరైన చర్యలు తీసుకోవడం లేదని ఆవేదన వ్యక్తం చేశారు.

బాలరాజు వ్యాఖ్యలకు స్పందించిన అరుణ... మంత్రులుగా ఉన్న మీరు కూడా ఇసుక మాఫియాను అడ్డుకోవచ్చు కదా అని వ్యాఖ్యానించారు. అంతేకాకుండా అలా అయితే దగ్గరుండి కాపలా కాయాలని, ఫ్లైట్లలో తిరిగితే, ఎసిలలో ఉంటే సరిపోదని అన్నారు. అరుణ వ్యాఖ్యలపై మనస్తాపం చెందిన మంత్రి బాలరాజు సమావేశం మధ్యలోనే బయటకు వెళ్లిపోయారు.

English summary

Minister Galla Aruna Kumari said on Thursday in Vishakapatnam that she have no differences with CM Kiran Kumar Reddy.