చాక్లెట్ పెడితే మూడేళ్ల చిన్నారి చేయిని తినేసిన పులి

బెంగళూరు: కర్నాటకలోని బళ్లారి నగరంలోని ఓ జంతు ప్రదర్శన శాలలో సరదాగా జంతువులు, పక్షులను చూసేందుకు వచ్చిన బాలుడు పులి దాడికి గురయ్యాడు. బాలుడు పులికి చాక్లెట్ పెట్టబోతే అది ఆ బాలుడి ఎడమ చేతిని కొరికేసింది. మూడేళ్ల బాధితుడు నిఖిల్ సోమవారం సాయంత్రం నాలుగు గంటల ప్రాంతంలో తన అమ్మమ్మ, ఇతరులతో కలిసి సరదాగా జూ చూసేందుకు వచ్చాడు. అందరూ జంతువులను ఆసక్తిగా చూస్తున్నారు.

ఈ సమయంలో నిఖిల్ తన వెంట తెచ్చుకున్న వేరుశనగకాయలను జింకలకు పెట్టాడు. మిగతా వారంతా జింకల దగ్గర ఉండగా ఇతడు మాత్రం పక్కనే ఉన్న పులి బోను వద్దకు వెళ్లాడు. అక్కడకు వెళ్లిన నిఖిల్ తన వద్ద ఉన్న చాక్లెట్‌ను పులి నోట్లో పెట్టే ప్రయత్నం చేశాడు. అయితే ఆ పులి క్షణాల్లో చిన్నారి ఎడమ చెయ్యిని నోట కరుచుకుంది. ఒక్కసారిగా బోనులోకి చెయ్యిని లాక్కొని తినేసింది. దీంతో బాలుడు ఆర్తనాదాలు పెట్టాడు.

ఇది విన్న అతని అమ్మమ్మ అక్కడకు వచ్చేలోపు దారుణం జరిగింది. వెంటనే జూ సిబ్బంది, సందర్శకులు అక్కడకు వచ్చి బాలుడిని రక్షించారు. నిఖిల్‌ను వెంటనే నిమ్స్ ఆసుపత్రికి తరలించారు. అతనికి వైద్యులు చికిత్స అందిస్తున్నారు. నిఖిల్ రామనగర్ జిల్లా చెన్నపట్టణ గ్రామానికి చెందిన నాగబాబు, లక్ష్మీల తనయుడు.

English summary

In a tragic incident here on Monday, a tiger at the Bellary zoo bit off the forearm of a toddler who was attempting to feed the animals chocolate.