మఠం కాదు, పార్టీ: తండ్రి కరుణానిధిపై అళగిరి ఫైర్

న్యూఢిల్లీ: పార్టీ వారసుడిగా తన తమ్ముడు స్టాలిన్‌ పేరును ప్రకటించిన తన తండ్రి, డిఎంకె చీఫ్ కరుణానిధిపై కేంద్ర మంత్రి ఎంకె అళగిరి తీవ్రంగా మండిపడ్డారు. వారసుడిని ప్రకటించడానికి డిఎంకె మఠం కాదని, పార్టీ అని ఆయన అన్నారు. పార్టీ వారసుడిని ప్రకటించడానికి పార్టీ అధినేతకు హక్కు లేదని ఆయన మీడియా ప్రతినిధులతో అన్నారు.

తన రాజకీయ వారసుడిగా స్టాలిన్ పేరును సూచిస్తూ కరుణానిధి చెన్నైలోని ఓ కార్యక్రమంలో గురువారం మాట్లాడిన విషయం తెలిసిందే. డిఎంకెలో చాలా కాలంగా స్టాలిన్, అళగిరి మధ్య వారసత్వ పోరు జోరుగా సాగుతోంది. స్టాలిన్ రాష్ట్రంలో పార్టీ వ్యవహారాలు చూస్తుండగా, ఆయన అన్న అళగిరి కేంద్ర మంత్రిగా ఉన్నారు. స్టాలిన్ తర్వాతనే అళగిరి రాజకీయాల్లోకి వచ్చారు.

డిఎంకె శంకర మఠం కాదని కరుణానిధి గతంలో చేసిన ప్రకటనను అళగిరి గుర్తు చేశారు. స్టాలిన్‌ను తప్ప మరొకరికి వారసత్వాన్ని అప్పగించే స్థితిలో 88 ఏళ్ల కరుణానిధి లేరు. ముఖ్యమంత్రి జయలలితను ఎదుర్కోవడానికి కూతురు కనిమొళి పనికి వస్తారని భావించినప్పటికీ ఆమె 2జి స్పెక్ట్రమ్ కుంభకోణం ఇరుక్కున్నారు. జయలలితను ఎదుర్కోవడంలో స్టాలిన్ దీటుగానే వ్యవహరిస్తున్నారు.

అళగిరి రాష్ట్రవ్యాప్త ప్రతిష్టను పెంచుకోలేకపోయారు. పైగా అళగిరి కుమారులు కుంభకోణాల్లో చిక్కుకున్నారు. మధురై కింగ్‌గా పేరు పొందిన అళగిరి తమ్ముడు స్టాలిన్ నాయకత్వాన్ని అంగీకరించక తప్పకపోవచ్చు.

English summary

DMK chief and Union minister M Karunanidhi's elder son MK Alagiri has reacted strongly to his father's naming younger brother MK Stalin as his successor. Speaking to reporters, Alagiri said the DMK is not a religious mutt, meaning that it's not up to the chief to name a successor.