టిడిపి ఆఫీసుకు దేవినేని ఉమ తమ్ముడి తాళం

విజయవాడ: తెలుగుదేశం పార్టీ కార్యాలయానికి ఆ పార్టీ శానససభ్యుడి తమ్ముడు చంద్రశేఖర్ తాళం వేయడం సంచలనం సృష్టిస్తోంది. పార్టీ కార్యాలయం ఉమ్మడి కుటుంబంలో చిచ్చు పెట్టింది. ఉమ్మడి ఆస్తిగా ఉన్న భవనంలో తెలుగుదేశం పార్టీ కార్యాలయం ఉంది. దీంతో చంద్రశేఖర్ తెలుగుదేశం పార్టీ కార్యాలయానికి గురువారంనాడు తాళం వేశారు.

చంద్రశేఖర్ కార్యాలయానికి తాళం వేసినప్పుడు దేవినేని ఉమ స్థానికంగా లేరు. ఉమ్మడి కుటుంబానికి చెందిన ఆస్తిలో వాటా ఇవ్వడం లేదని ఆరోపిస్తూ చంద్రశేఖర్ ఆ చర్యకు దిగారు. తన సోదరుడి ఆధిపత్య ధోరణికి నిరసనగా తాళం వేసినట్లు చంద్రశేఖర్ చెప్పారు .

తమ అనుమతి లేకుండా తమ భవనంలో తెలుగుదేశం పార్టీ కార్యాలయాన్ని పెట్టే హక్కు దేవినేని ఉమకు లేదని చంద్రశేఖర్ అన్నారు. ఉమ్మడి ఆస్తుల నుంచి లభిస్తున్న ఆదాయంలో తమకు వాటా ఇవ్వడం లేదని ఆయన దేవినేని ఉమపై ఆరోపణలు చేశారు. ఈ విషయంపై మాట్లాడేందుకు ఉమామహేశ్వర రావు అందుబాటులో లేరని స్థానిక మీడియా రాసింది.

కాగా, చంద్రశేఖర్ గతంలో వైయస్సార్ కాంగ్రెసు పార్టీలో చేరి, ఆ తర్వాత తెలుగుదేశం పార్టీలోకి వచ్చినట్లు వార్తలు వచ్చాయి. అయితే, చంద్రశేఖర్ వైయస్సార్ కాంగ్రెసు పార్టీలోనే కొనసాగుతున్నట్లు తెలుస్తోంది.

English summary

Owing to family disputes, local Telugu Desam legislator Devineni Umamaheswara Rao's younger brother Chandrasekhar on Thursday locked up the party office located in a building owned by the joint family. The incident shocked the TDP circles in Krishna district.