శ్రీశాంత్ ఫ్రెండ్ అరెస్టు: శ్రీనివాసన్‌ను తప్పుపట్టిన పవార్

By Pratap

Updated: Wednesday, May 29, 2013, 18:47 [IST]

న్యూఢిల్లీ: స్పాట్ ఫిక్సింగ్ కేసులో కటకటాల వెనక్కి వెళ్లిన ఫాస్ట్ బౌలర్ శ్రీశాంత్ మిత్రుడు అభిషేక్ శుక్లాను పోలీసులు అరెస్టు చేశారు. సాక్ష్యాలను తొలగించాడనే ఆరోపణలపై శుక్లాను పోలీసులు అరెస్టు చేశారు. క్రికెటర్ల డబ్బులను, ఇతర వస్తువులను శుక్లా దాచేశాడని పోలీసులు ఆరోపిస్తున్నారు. వాటిని స్వాధీనం చేసుకోవడానికి శుక్లాలను పోలీసులు ముంబై తీసుకుని వెళ్లారు.

ఇదిలావుంటే, ఐపియల్‌లో స్పాట్ ఫిక్సింగ్, బెట్టింగు వ్యవహారాలకు బిసిసిఐ మాజీ అధ్యక్షుడు శరద్ పవార్ ప్రస్తుత అధ్యక్షుడు ఎన్ శ్రీనివాసన్‌ను తప్పు పట్టారు. దానికి శ్రీనివాసన్ బాధ్యత వహించాలని ఆయన అన్నారు. స్పాట్ ఫిక్సింగ్, బెట్టింగ్ వ్యవహారంపై ఆయన తీవ్ర అసంతృప్తి వ్యక్తం చేశారు.

ప్రస్తుత పరిస్థితికి ఎంతో బాధేస్తోందని, విచారం కలుగుతోందని ఆయన అన్నారు. బిసిసిఐ అధ్యక్షుడిగా తాను ఉండి ఉంటే ఇటువంటి పరిస్థితి వచ్చి ఉండేది కాదని ఆయన అన్నారు. స్పాట్ ఫిక్సింగ్ వివాదానికి శ్రీనివాసన్ బాధ్యత వహించాలని ఆయన అన్నారు.

బిసిసిఐ చీఫ్‌గా శ్రీనివాసన్ రాజీనామా డిమాండ్‌పై పవార్ మాట్లాడలేదు. స్పాట్ ఫిక్సింగ్, బెట్టింగ్ వ్యవహారాలపై హోం మంత్రిత్వ శాఖ విచారణ జరిపించాలన్న శశాంక్ మనోహర్ అభిప్రాయాన్ని శరద్ పవార్ బలపరిచారు.