వైయస్‌కు దోచుకోవడం తెలియదు: విజయమ్మ

గుంటూరు: తన భర్త, మాజీ ముఖ్యమంత్రి వైయస్ రాజశేఖర రెడ్డికి దోచుకోవడం, దాచుకోవడం తెలియదని వైయస్సార్ కాంగ్రెసు పార్టీ గౌరవాధ్యక్షురాలు, పులివెందుల శానససభ్యురాలు వైయస్ విజయమ్మ అన్నారు. గుంటూరు జిల్లా చిలుకలూరిపేట పార్టీ ప్రాంతీయ సదస్సులో ఆమె సోమవారం ప్రసంగించారు. రాష్ట్రంలో ప్రజా వ్యతిరేక పాలన కొనసాగుతోందని, ప్రజలకు అండగా వైయస్ కుటుంబం ఉంటుందని ఆమె అన్నారు.

లక్ష కోట్ల రూపాయలతో వైయస్ రాజశేఖర రెడ్డి జలయజ్ఞం పథకం ప్రవేశపెట్టారని ఆమె గుర్తు చేశారు. స్థానిక సంస్థల ఎన్నికలను ఆషామాషీగా తీసుకోకూడదని ఆమె అన్నారు. ప్రజల్లో పార్టీకి మంచి ఆదరణ ఉందని చెప్పారు. రిజర్వేషన్లలో అక్రమాలు జరిగితే కోర్టుకు వెళ్తామని ఆమె చెప్పారు. కిరణ్ కుమార్ రెడ్డి వ్యవహారశైలిని కూడా ప్రజలకు వివరించాలని ఆమె పార్టీ కార్యకర్తలకు సూచించారు.

ఆరోగ్యశ్రీలో వందకుపైగా వ్యాధులను తొలగించారని, 108కి ఫోన్ చేస్తే వాహనం ఎప్పుడు వస్తుందో తెలియదని విజయమ్మ అన్నారు. గ్రామసభల అనుమతి లేకుండానే పనులు జరుగుతున్నాయని ఆమె విమర్శించారు. కరెంట్ కోతలతో గ్రామాల ప్రజలు అల్లాడుతున్నారని అన్నారు స్థానిక సంస్థల ఎన్నికలంటే భయంలేదని కిరణ్ కుమార్ రెడ్డి అంటున్నారని, కిరణ్ కుమార్ రెడ్డి భయం ఎవరికి కావాలని అన్నారు.

కేంద్రం నుంచి పంచాయతీలకు రావాల్సిన నిధులు ఆగిపోయాయని అన్నారు. తన ప్రభుత్వ హయాంలో ప్రస్తుత తెలుగుదేశం పార్టీ అధ్యక్షుడు నారా చంద్రబాబు నాయుడు గ్రామపంచాయతీలకు నిధులు ఎందుకని అన్నారని ఆమె గుర్తు చేశారు. పంచాయతీ ఎన్నికల్ోల కూడా కుమ్మక్కు కుట్రలు సాగుతున్నాయని ఆమె విమర్శించారు. కాంగ్రెసు, తెలుగుదేశం పార్టీలకు ఎందుకు ఓటేయాలని ఆమె అడిగారు.

ఉత్తరాఖండ్ ప్రకృతి వైపరీత్యంలో మరణించినవారి ఆత్మకు శాంతి కలగాలని ప్రార్థిస్తూ రెండు నిమిషాల పాటు మౌనం పాటించారు. తమ పార్టీ శాసనసభ్యులు, ఎమ్మెల్సీలు వరద బాధితులకు ఒక నెల జీతం విరాళంగా ఇస్తారని ఆమె ప్రకటించారు.

English summary

The YSR Congress party honorary president YS Vijayamma said that YS RajasekhaR Reddy never indulged in corrupt practices. She lashed out at the Telugudesam party president Nara Chandrababu Naidu.