ఏపీలో ఏకీకృత పెన్షన్ పథకం మార్గదర్శకాలు జారీ..! ఈ ఉద్యోగులకు..!

ఏపీలో జాతీయ పెన్షన్ పథకం (ఎన్పీఎస్) ఆధారంగా అఖిల భారత సర్వీసు అధికారులకు, సీసీఎస్ అధికారులకు ఏకీకృత పెన్షన్ పథకం అమలుకు వీలుగా ప్రభుత్వం (AP Govt) ఇవాళ మార్గదర్శకాలు జారీ చేసింది. 2025 ఏప్రిల్ 1 నుండి అమలులోకి వచ్చేలా ఆయా అధికారుల కోసం జాతీయ పింఛను వ్యవస్థ (NPS) క్రింద ఏకీకృత పింఛను పథకం (UPS)ను అమలు చేయడానికి సంబంధించిన కార్యాచరణ మార్గదర్శకాలపై ఉత్తర్వులు జారీ చేసింది.

కేంద్ర ప్రభుత్వం ఎన్పీఎస్ పరిధిలోకి వచ్చే ఉద్యోగుల కోసం యూపీఎస్ ను ఒక ఐచ్ఛిక పింఛను పథకంగా ప్రవేశపెట్టింది. దీని ముఖ్య ఉద్దేశ్యం ఒక నిర్దిష్ట కాంట్రిబ్యూషన్ ఫ్రేమ్‌వర్క్ ద్వారా స్థిరమైన, ఊహించదగిన పదవీ విరమణ ఆదాయాన్ని అందించడం, పదవీ విరమణ తర్వాత క్రమబద్ధమైన చెల్లింపు ఆప్షన్స్ ఇవ్వడం. యూపీఎస్ ను ఎంచుకునే ఏఐఎస్, సీసీఎస్ అధికారుల కోసం ఏపీ ప్రభుత్వం ఇవాళ మార్గదర్శకాలను విడుదల చేసింది.

దీని అమలు, పెన్షన్ పథకం చందాదారుల డేటా నిర్వహణ, నిధుల బదిలీలకు బాధ్యత వహించే రాష్ట్ర నోడల్ అధికారిగా మంగళగిరి పే అండ్ అకౌంట్స్ ఆఫీసర్‌ను నియమించారు. కాబట్టి ఇకపై కొత్తగా నియమితులైన అధికారులు తమ యూపీఎస్ ఆప్షన్ ను తమ డీడీవోకు తెలియజేయాలి. వారు ఆ డేటాను ఆన్‌లైన్‌లో ఫార్వార్డ్ చేసి UPS PRAN (శాశ్వత పదవీ విరమణ ఖాతా సంఖ్య)ను రూపొందిస్తారు. ఉద్యోగుల నుండి వచ్చే నెలవారీ చెల్లింపులు, ప్రభుత్వ సహ-చెల్లింపులు, CFMS సర్వర్, CRA (సెంట్రల్ రికార్డ్ కీపింగ్ ఏజెన్సీ), మరియు PAO (పే అండ్ అకౌంట్స్ ఆఫీసర్) స్ట్రీమ్ నుంచి UPS పూల్డ్ ఖాతాకు బదిలీ చేస్తారు.

సాధారణ ప్రభుత్వ విభాగాలలోని అధికారుల విషయంలో, చెల్లింపులు జీతాల నుండి తీసేసి, CFMS ద్వారా నమోదు చేసి, NPS ట్రస్ట్ ద్వారా తయారైన, ధృవీకరించబడిన ట్రాన్సాక్షన్ ఐడీలతో ఆటోమేటెడ్ లావాదేవీల ద్వారా బదిలీ చేస్తారు. విదేశీ సేవలోని అధికారుల విషయంలో, చెల్లింపులు చలాన్‌ల ద్వారా పంపుతారు. నిధుల బదిలీ కోసం డేటా కూడా ఇదే విధంగా నమోదు చేసి ప్రాసెస్ చేస్తారు. బిల్లులను రూపొందించడం, చెల్లింపులను ఆమోదించడం, బదిలీ అయిన అధికారులకు సంబంధించిన పెండింగ్‌లో ఉన్న లేదా అందని చెల్లింపులను నిర్వహించడంతో సహా, చెల్లింపులు నిర్దేశిత UPS ఖాతాలకు జమ అయ్యాయని పీఏవోలు నిర్ధారించుకోవాల్సి ఉంటుంది.

PAOలు PRANలను రూపొందించడం, విత్ డ్రావల్స్ ను ప్రాసెస్ చేయడం, వ్యక్తిగత వివరాలను అప్డేట్ చేయడం, సాఫ్ట్‌వేర్ మార్పుల కోసం APCFSSతో సమన్వయం చేసుకోవడం వంటి కార్యకలాపాలను నిర్వహించాలి. నిర్దిష్ట నెలలకు UPSకు బదిలీ చేయబడిన అధికారుల కాంట్రిబ్యూషన్లను బదిలీ చేయడం, మార్చి 31, 2026 నాటికి బకాయి ఉన్న బకాయిలను జమ చేయడం ట్రెజరీస్, అకౌంట్స్ డైరెక్టర్ బాధ్యత. UPS సజావుగా అమలు అయ్యేలా చూసేందుకు, కాంట్రిబ్యూషన్ల సేకరణ, నిధుల బదిలీ, రికార్డుల నిర్వహణ కోసం క్రమబద్ధమైన, పారదర్శకమైన విధానాల కోసం ఈ మార్గదర్శకాలు జారీ చేశారు.