ఏపీఎస్ఆర్టీసీ.. సౌతిండియా టూర్ ప్యాకేజీ: అరుణాచలం సహా అన్నీ కవర్..!!

APSRTC: గురు పౌర్ణమిని పురస్కరించుకుని తమిళనాడులో గల ప్రఖ్యాత శైవక్షేత్రం అరుణాచలం గిరి ప్రదక్షిణ చేయాలనుకునే భక్తుల సౌకర్యం కోసం రాష్ట్ర రోడ్డు రవాణా సంస్థ ప్రత్యేకంగా ప్యాకేజీ టూర్ ను అందుబాటులోకి తీసుకొచ్చింది. దీనికి- ఆధ్యాత్మిక క్షేత్రదర్శనం అని పేరు పెట్టింది.

జులై 8, 20 తేదీల్లో ఈ ప్రత్యేక బస్సులు అరుణాచలం యాత్రకు బయలుదేరి వెళ్లనున్నాయి. మొత్తం రెండు ప్యాకేజీ టూర్లు ఇందులో అందుబాటులో ఉన్నాయి. ఈ రెండింటికీ ప్రత్యేక ఛార్జీ, రూట్ మ్యాప్ వేర్వేరుగా నిర్ధారించారు ఆర్టీసీ అధికారులు.

అరుణాచలం యాత్రకు జులై 8వ తేదీన సాయంత్రం 4 గంటలకు రాజమండ్రి నుంచి బస్సులు బయలుదేరి వెళ్లనున్నాయి. అదే నెల 10వ తేదీన గురుపౌర్ణమి నాటికి అరుణాచలానికి చేరుకుంటాయి. ఈ యాత్రలో భాగంగా కాణిపాకం వరసిద్ధి వినాయకస్వామి ఆలయం, శ్రీపురం గోల్డెన్ టెంపుల్ ను భక్తులు దర్శించుకోవచ్చు.

గురు పౌర్ణమి నాడు అరుణాచలం గిరి ప్రదక్షిణ అనంతరం ఈ బస్సులు రాజమండ్రికి తిరుగముఖం పడతాయి. తిరుగుప్రయాణంలో కాంచీపురంలో వెలిసిన కంచి కామాక్షి అమ్మవారి ఆలయం, శ్రీకాళహస్తిలో కాళహస్తీశ్వరుడి ఆలయాలను దర్శించుకునే వెసలుబాటు ఉంది. ఈ ప్యాకేజీ ఛార్జీ 5,200 రూపాయలు. ఆర్టీసీ భోజన సదుపాయాన్ని కల్పిస్తుంది.

అరుణాచలం- రామేశ్వరం యాత్ర తొమ్మిది రోజుల పాటు సాగుతుంది. దక్షిణాదిన గల ప్రఖ్యాత ఆలయాలు, పర్యాటక ప్రదేశాలను సందర్శించవచ్చు. జులై 20వ తేదీన రాజమండ్రి నుంచి బయలుదేరే బస్సు తొలుత కాణిపాకం వరసిద్ధి వినాయకస్వామి ఆలయానికి చేరుకుంటుంది.

అక్కడి నుంచి శ్రీపురం- గోల్డెన్ టెంపుల్, అరుణాచలం, పళని- సుబ్రహ్మణ్యస్వామి ఆలయాన్ని సందర్శించవచ్చు. కోయంబత్తూర్, ఊటీ, మైసూర్ ప్యాలెస్, గురువాయూర్ ఆలయం, తిరువనంతపురం, కన్యాకుమారి, మధురై, రామేశ్వరం, శ్రీరంగం, తంజావూరును దర్శించవచ్చు. దీనికి ఛార్జీ 11,300 రూపాయలు.

English summary

The Andhra Pradesh State Road Transport Corporation (APSRTC) has announced Arunachalam- Rameswaram package tour. అరుణాచలం- రామేశ్వరం ప్యాకేజీ టూర్ ను ఏపీఎస్ఆర్టీసీ ప్రకటించింది. దీనికి సంబంధించిన ఛార్జీలు, ఇతర వివరాల కోసం..