గుంటూరు-తిరుపతి ఎక్స్ ప్రెస్ కు సీమలో కొత్త స్టాప్ లు..! రేపటి నుంచే..!

ఏపీలోని గుంటూరు (guntur) నుంచి తిరుపతికి రాకపోకలు సాగించే ఎక్స్ ప్రెస్ రైలు ప్రయాణికులకు దక్షిణ మధ్య రైల్వే మరో అలర్ట్ జారీ చేసింది. గుంటూరు-తిరుపతి ఎక్స్ ప్రెస్ రైలుకు ప్రస్తుతం ఉన్న డిమాండ్ నేపథ్యంలో రెండు కొత్త హాల్ట్ లను ప్రయోగాత్మకంగా కల్పించాలని రైల్వేశాఖ నిర్ణయించింది. వీటిని కూడా రాయలసీమ ప్రాంతంలోని రెండు స్టేషన్లలో కల్పిస్తున్నారు. దీంతో సీమ నుంచి తిరుపతికి వెళ్లే ప్రయాణికులకు ఇది ఉపయోగపడనుంది.

గుంటూరు నుంచి తిరుపతికి రాకపోకలు సాగించే ఎక్స్ ప్రెస్ రైళ్లు (నంబర్లు 17261/17262)కు రాయలసీమలోని కడప జిల్లా జమ్మలమడుగు, నంద్యాల జిలా కోయిలకుంట్లలో హాల్ట్ ఇవ్వాలనే డిమాండ్లు ఎప్పటి నుంచో ఉన్నాయి. వీటిని పరిశీలించిన దక్షిణ మధ్య రైల్వే.. తాజాగా కీలక నిర్ణయం తీసుకుంది. ఈ రెండు స్టేషన్లలోనూ ప్రయోగాత్మకంగా హాల్ట్ లు ఇవ్వాలని నిర్ణయించారు. ఈ నిర్ణయం రేపటి నుంచే అమల్లోకి కూడా తెస్తున్నారు. ఈ మేరకు అధికారులు ఓ ప్రకటన చేశారు.

Experimental Stoppages Introduced 🚆
To facilitate passengers, SCR is providing experimental stoppages for Train Nos. 17261/17262 (Guntur–Tirupati–Guntur) at Jammalamadugu & Koilakuntla with effect from 08 Feb 2026.#PassengerConvenience #SouthCentralRailway pic.twitter.com/wfeDfGlt3U

— South Central Railway (@SCRailwayIndia) February 7, 2026

గుంటూరు-తిరుపతి-గుంటూరు రైలుకు రేపటి నుంచి జమ్మలమడుగు, కోయిలకుంట్లలో కల్పిస్తున్న అదనపు స్టాప్ లను ప్రస్తుతానికి ఆరునెలల పాటు ప్రయోగాత్మకంగానే ఇస్తున్నట్లు అధికారులు తెలిపారు. అంటే ఆయా స్టేషన్లలో ప్రయాణికుల ట్రాఫిక్ ను ఆరు నెలల పాటు అంచనా వేసి ఆ తర్వాత ఫర్వాలేదనుకుంటే వీటిని కొనసాగిస్తారు. లేకపోతే వీటిని తొలగించే అవకాశం కూడా ఉంటుందన్న మాట. కాబట్టి ఈ రెండు స్టేషన్లలో ప్రయాణికులు ఈ విషయాన్ని గుర్తించాల్సి ఉంటుంది.