AP rains: ఏపీకి తీవ్ర వాయుగుండం ముప్పు-ఈ జిల్లాల్లో 4 రోజులు భారీవర్షాలు..!

పశ్చిమ మధ్య, ఆనుకొని ఉన్న తూర్పు మధ్య బంగాళాఖాతంలో అల్పపీడనం కేంద్రీకృతమై ఉంది. ఇది పశ్చిమ మధ్య బంగాళాఖాతంలో రేపటికి వాయుగుండంగా బలపడి, ఆ తర్వాత 24 గంటల్లో తీవ్ర వాయుగుండంగా మారే అవకాశం ఉంది. బుధవారం ఉదయానికి పశ్చిమ వాయువ్య దిశగా కదులుతూ దక్షిణ ఒడిశా-ఉత్తరాంధ్ర తీరాలకు చేరుకునే అవకాశం ఉంది. దీని ప్రభావంతో రాష్ట్రంలోని పలు జిల్లాల్లో భారీ వర్షాలు కురుస్తాయని (Heavy Rain Alert) రాష్ట్ర విపత్తుల నిర్వహణ సంస్థ తెలిపింది.

మంగళవారం అల్లూరి, పోలవరం, విశాఖ జిల్లాల్లో అక్కడక్కడ మోస్తరు నుంచి భారీ వర్షాలు, మిగతా కోస్తా జిల్లాల్లో కొన్నిచోట్ల మోస్తరు వర్షాలు, రాయలసీమలో తేలికపాటి నుంచి మోస్తరు వర్షాలు కురిసే అవకాశం ఉందని విపత్తుల నిర్వహణ సంస్ద తెలిపింది.
బుధవారం అల్లూరి, పోలవరం,ఏలూరు, ఎన్టీఆర్, కృష్ణా జిల్లాల్లో అక్కడక్కడ భారీ వర్షాలు, ఉత్తరాంధ్ర జిల్లాల్లో మోస్తరు నుంచి భారీ వర్షాలు కురిసే అవకాశం ఉందని వెల్లడించింది. గురు, శుక్రవారాల్లో కోస్తా జిల్లాల్లో మోస్తరు నుంచి భారీ వర్షాలు, ప్రకాశం, నెల్లూరు, కర్నూలు, నంద్యాల జిల్లాల్లో కొన్ని ప్రాంతాల్లో మోస్తరు వర్షాలు కురిసే అవకాశం ఉందని పేర్కొంది. మిగతా జిల్లాల్లో తేలికపాటి నుంచి మోస్తరు వర్షాలు కురిసే అవకాశం ఉందని తెలిపింది.

తీవ్ర వాయుగుండం కారణంగా సముద్రం అలజడిగా ఉండి అలలు ఎగసిపడే అవకాశం ఉన్నందున మత్స్యకారులు వేటకు వెళ్ళరాదని అధికారులు హెచ్చరించారు. ముఖ్యంగా కోస్తా తీరం వెంబడి గంటకు 50-60కిమీ వేగంతో ఈదురుగాలులు వీచే అవకాశం ఉందన్నారు. కాబట్టి ఆయా ప్రాంతాల్లో ప్రజలు అప్రమత్తంగా ఉండాలని సూచిస్తున్నారు. వాయుగుండం ప్రభావంతో ఇవాళ కూడా పలు జిల్లాల్లో వర్షాలు కురిశాయి. ఇవాళ సాయంత్రం నాటికి కాకినాడ జిల్లా శంఖవరంలో 60.7 మిమీ, ఎన్టీఆర్ జిల్లా నందలూరులో 52.5మిమీ, కాకినాడ జిల్లా పెద్దాపురంలో 48.2మిమీ, నంద్యాల జిల్లా దుర్వేసిలో 45.5మిమీ, ఎన్టీఆర్ జిల్లా కవులూరులో 45.3మిమీ,చిత్తూరు జిల్లా రామకుప్పంలో 39.3మిమీ, అనంతపురం జిల్లా డి.హీరేహాల్ 35.5మిమీ, కర్నూలు జిల్లా పత్తికొండలో 31.5 మిమీ చొప్పున వర్షపాతం నమోదైంది.