కిరణ్ మానసికంగా కుంగిపోయారు, ఇక సేవే: లగడపాటి

Updated: Saturday, March 1, 2014, 16:51 [IST]

విజయవాడ: రాష్ట్ర విభజనతో మాజీ ముఖ్యమంత్రి కిరణ్ కుమార్ రెడ్డి మానసికంగా కుంగిపోయారని విజయవాడ మాజీ పార్లమెంటు సభ్యుడు లగడపాటి రాజగోపాల్ తెలిపారు. శనివారం విజయవాడకు వచ్చిన ఆయన మీడియాతో మాట్లాడారు. లగడపాటి రాజగోపాల్‌కు ఈ సందర్భంగా ప్రజలు, అభిమానులు ఘన స్వాగతం పలికారు.

రాష్ట్ర విభజన సమయంలో కిరణ్ కుమార్ రెడ్డిని నమ్మి చాలా మంది సమైక్యాంధ్ర ఉద్యమంలోకి వచ్చారని లగడపాటి తెలిపారు. కిరణ్ కుమార్ రెడ్డి ఏ నిర్ణయం తీసుకున్నా.. అందుకు కట్టుబడి ఉంటానని లగడపాటి రాజగోపాల్ ప్రకటించారు. తాను తిరిగి రాజకీయాల్లోకి రానని స్పష్టం చేశారు.

I am not in politics and I will not come: Lagadapati

తనకు మద్దతు నిలిచిన ప్రజలకు లగడపాటి రాజగోపాల్ ధన్యవాదాలు తెలిపారు. తాను ఒంటరిగానే విజయవాడకు వచ్చినట్లు తెలిపారు. కులం, మతం పేరుతో రాజకీయాలు తగవని ఆయన అన్నారు. సమైక్యాంధ్ర అందరి భవిష్యత్ అని తాను నమ్మినట్లు లగడపాటి రాజగోపాల్ తెలిపారు.

రాష్ట్ర విభజనకు విధి సహకరించిందని ఆయన అన్నారు. ప్రజాసేవ చేసేందుకు రాజీకీయాలు అవసరం లేదని లగడపాటి రాజగోపాల్ తెలిపారు. రాజకీయాల్లో లేకపోయినా తాను ప్రజాసేవ చేస్తానని లగడపాటి రాజగోపాల్ స్పష్టం చేశారు. అయితే కొందరు అభిమానులు మాత్రం రాజకీయాల్లోకి తిరిగి రావాలని డిమాండ్ చేశారు. వారికి లగడపాటి సర్దిచెప్పారు.