తల పట్టుకోవాలి: లగడపాటి, జెపిని టార్గెట్ చేసిన మిత్రా

హైదరాబాద్/న్యూఢిల్లీ: ఆంధ్ర ప్రదేశ్ రాష్ట్ర పునర్వ్యవస్థీకరణ బిల్లును ఎందుకు పెట్టామా? అని బడ్జెట్ సమావేశాల్లో కాంగ్రెసు పార్టీ తల బాదుకునేలా చేస్తామని విజయవాడ పార్లమెంటు సభ్యులు లగడపాటి రాజగోపాల్ ఆదివారం చెప్పారు. ఆయన ఢిల్లీలో విలేకరులతో మాట్లాడారు.

ఇటీవల తాము కేంద్ర ప్రభుత్వంపై పెట్టిన అవిశ్వాసం కేవలం ట్రయలర్ మాత్రమే అన్నారు. విభజన విషయంలో కేంద్రం అలాగే ముందుకెళ్తే ఢిల్లీలో వేడి పుట్టించాల్సిందేనన్నారు. ఢిల్లీలో ఆందోళనల కోసం తాము ముప్పై, నలభై రైళ్లలో ఢిల్లీకి వెళ్తామని లగడపాటి చెప్పారు.

టార్గెట్ జెపి

తెలంగాణ ఏర్పాటు అవసరం, అనివార్యం అని చెప్పిన లోక్‌సత్తా పార్టీ అధ్యక్షులు, కూకట్‌పల్లి శాసన సభ్యులు జయ ప్రకాశ్ నారాయణ పైన సమైక్యవాదులు మండిపడుతున్నారు. సమైక్యవాదులు, ఎపిఎన్జీవో, తెలుగు ప్రజా వేదిక కన్వీనర్ డాక్టర్ మిత్రా జెపిపై ఆగ్రహం వ్యక్తం చేస్తున్నారు.

సీమాంధ్రకు ప్యాకేజీ అడుగుతున్న జెపికి కేంద్రం వద్ద నిధులు లేవని తెలియదా అని మిత్రా ప్రశ్నించారు. మెజార్టీ లేకుండా విభజన అనడం దురదృష్టకరమన్నారు. విభజన అవసరం ఎందుకో జెపి చెప్పాలని నిలదీశారు. రెచ్చగొట్టిన తెలంగాణ ఉద్యమానికి జెపి మద్దతు పలకడమేమిటని ప్రశ్నించారు. జెపి వ్యాఖ్యలను తాము తీవ్రంగా ఖండిస్తున్నామన్నారు. ఇందిరాపార్కు వద్ద తెలంగాణ ప్రజా వేదిక దీక్షకు దిగింది. ఈ సందర్భంగా వారు మాట్లాడారు.

మరోవైపు సమైక్యాంధ్రకు మద్దతుగా త్వరలో రేపు అసెంబ్లీని ముట్టడిస్తామని సమైక్యాంధ్ర ఐకాస హెచ్చరించింది. లోక్‌సత్తా పార్టీ కార్యాలయాలను ముట్టడిస్తామన్నారు. 23వ తేదీ తర్వాత ఉద్యమాన్ని ఉధృతం చేస్తామని చెప్పారు.

కాగా, శాసన మండలిలో తెలంగాణ ముసాయిదా బిల్లు పైన ఆదివారం చర్చ జరిగింది. మండలిలో ఆరుగురు సీమాంధ్ర మంత్రులు పాల్గొన్నారు. తెలంగాణ మంత్రులు పాల్గొనలేదు. ఎంపి ఉండవల్లి అరుణ్ కుమార్ గ్యాలరీలో కూర్చొని చర్చను విన్నారు. అనంతరం మండలి సోమవారానికి వాయిదా పడింది.

English summary

Vijayawada MP Lagadapati Rajagopal on Sunday said they will stall Telangana Draft Bill in Parliament.