అసెంబ్లీ: చేతిల్లో చేతులేసి మాటలు కలిపారు (పిక్చర్స్)

By Pratap

Updated: Thursday, December 12, 2013, 15:27 [IST]

హైదరాబాద్: రాష్ట్ర శాసనసభ శీతాకాలం సమావేశాలు గురువారం ప్రారంభమయ్యాయి. ప్రారంభం రోజు వివిధ పార్టీల నాయకులు తమ తమ కండువాలతో, గుర్తులతో శాసనసభకు వచ్చారు. సమైక్య, తెలంగాణవాదాలతో వాతావరణం వేడిగా ఉన్నప్పటికీ అవన్నీ పక్కన పెట్టి శాసనసభ్యులు పలకరించుకున్నారు. కరచాలనాలు చేసుకున్నారు.

గురువారం శాసనసభ మృతి చెందిన మాజీ శాసనసభ్యులకు నివాళులు అర్పించింది. నల్లసూరీడు నెల్సన్ మండేలాకు నివాళులు అర్పిస్తూ తీర్మానం చేసింది. శుక్రవారం నుంచి సమైక్య, తెలంగాణ నినాదాలతో శాసనసభను వేడెక్కించడానికి తగిన ఏర్పాట్లను అన్ని పార్టీలూ చేసుకున్నాయి.

తెలంగాణకు అనుకూలంగా ఉన్న బిజెపి, సిపిఐ, తదితర పార్టీల శాసనసభ్యులు గన్‌పార్క్ వద్ద గల తెలంగాణ అమరవీరుల స్థూపం వద్ద నివాళులు అర్పించి శాసనసభకు వచ్చారు. తెలంగాణ ముసాయిదా బిల్లు కూడా రాష్ట్రానికి వచ్చిన నేపథ్యంలో దాన్ని ఈ సభలోనే ప్రవేశపెట్టాలని ఆ పార్టీలు డిమాండ్ చేసే అవకాశం ఉంది. సీమాంధ్ర శాసనసభ్యులు సమైక్య తీర్మానం ప్రతిపాదించడానికి సిద్ధపడుతున్నాయి.

సైకిల్‌పై జూలకంటి..

సిపిఎం ఏకైక శాసనసభ్యుడు జూలకంటి రంగారెడ్డి సైకిల్‌పై శాసనసభకు వచ్చారు. ఆయనతో పాటు అసెంబ్లీ వరకు సిపిఎం కార్యదర్శి బివి రాఘవులుతో పాటు తదితరులు సైకిల్ తొక్కారు.