ప్రైవేట్ బస్సుల సంక్రాంతి బాదుడుకు చెక్.. జోరుగా తనిఖీలు; అడ్డగోలుగా దోచేస్తే కేసులేనట!!

Published: Tuesday, January 10, 2023, 8:45 [IST]

సంక్రాంతి పండుగ అంటేనే తెలుగు రాష్ట్రాల ప్రజలు అత్యంత ఘనంగా జరుపుకునే పెద్ద పండుగ అని అందరికీ తెలిసిందే. సంక్రాంతి పండుగ సమయంలో పట్టణాలన్నీ ఖాళీ అయ్యి పల్లెలు నిండుగా కనిపిస్తాయి. ఇక ఈ సంవత్సరం కూడా సంక్రాంతి పండుగ సమయాల్లో తెలుగు రాష్ట్రాల్లో బస్సులు, రైళ్ళు కిటకిటలాడుతున్నాయి. సొంత ఊళ్లకు వెళ్లే వాళ్లతో బస్టాండ్లు, రైల్వే స్టేషన్లు రద్దీగా ఉన్న పరిస్థితి కనిపిస్తుంది.

ప్రైవేట్ ట్రావెల్స్ పై కొరడా ఝుళిపించనున్న రవాణా శాఖ

పండుగకు పది రోజుల ముందు నుండే టిక్కెట్ల ధరలను పెంచి ప్రైవేటు ట్రాన్స్ పోర్ట్ యజమానులు అందినకాడికి దండుకోవాలని ప్రయత్నం చేస్తున్నారు. అయితే అలాంటి వాళ్ళని దృష్టిలో పెట్టుకుని ప్రైవేటు ట్రావెల్స్ కు రవాణా శాఖ అధికారులు తీవ్ర హెచ్చరికలు జారీ చేశారు. ఎవరైనా అధిక చార్జీలు వసూలు చేస్తే కేసులు పెడతామని హెచ్చరిస్తున్నారు. సంక్రాంతి నేపథ్యంలో ప్రైవేటు బస్సులను తనిఖీ చేయాలని జిల్లాల డీటీసీలతో సమావేశం నిర్వహించిన రవాణా శాఖ కమిషనర్ ఆంజనేయులు ఈ మేరకు ఆదేశాలు జారీ చేశారు.

అధిక బస్సు టికెట్ ఛార్జీలు వసూలు చేస్తే కఠిన చర్యలు, తనిఖీలు షురూ

అధిక చార్జీలు వసూలు చేస్తే కఠిన చర్యలు తీసుకోవాలని, సంక్రాంతి పండుగ ముగిసేవరకు పది రోజులపాటు తనిఖీలు చేయాలని పేర్కొన్నారు. విపరీతంగా ధరలు పెంచితే ప్రయాణికులు కూడా నేరుగా రవాణాశాఖ అధికారులకు ఫిర్యాదు చేయొచ్చని తెలిపారు. ఆన్లైన్లో బస్సు ఛార్జీలు ధరలను చూసి, ధరలు అధికంగా వేసిన వారిపైన కఠిన చర్యలు తీసుకుంటామని రవాణా శాఖ అధికారులు చెబుతున్నారు. ఫిట్నెస్, ధ్రువపత్రాలు లేని బస్సులను సీజ్ చేస్తామని, అయితే అటువంటి బస్సులను గమ్యస్థానం చేరిన తర్వాత మాత్రమే సీజ్ చేస్తామని వెల్లడించారు.

ప్రయాణికులు కూడా ఫిర్యాదు చెయ్యొచ్చు

రవాణా శాఖ వెబ్సైట్లో ఉన్న ఫోన్ నెంబర్లకు కూడా ప్రయాణికులు ఫిర్యాదులు చేయొచ్చని రవాణా శాఖ సంయుక్త కమిషనర్ వెంకటేశ్వరరావు వెల్లడించారు. గత సంవత్సరం సంక్రాంతి పండుగ సందర్భంగా నిర్వహించిన తనిఖీల్లో 975 కేసులు నమోదు చేసి, 62 లక్షల మేర జరిమానా విధించామని గుర్తు చేశారు. రవాణాశాఖ నిబంధనలను ఉల్లంఘించి, నేరాల తీవ్రతను బట్టి కేసులు నమోదు చేసి వారిని ప్రాసిక్యూట్ చేస్తామని ఆయన తెలిపారు. అంతేకాదు ఆర్టీసీ బస్టాండ్ వద్ద కు ప్రైవేట్ బస్సులు రాకుండా కఠిన చర్యలు తీసుకుంటామన్నారు. ఇక తాజా ఆదేశాలతో బాగా టికెట్ ధరలు పెంచిన ట్రావెల్స్ పై కొరడా ఝుళిపించటం కోసం రవాణా శాఖ అధికారులు రంగంలోకి దిగనున్నారు.

Published On January 10, 2023