నిరుద్యోగులకు షాక్- ఒకే రోజు ఆ రెండు పరీక్షలు..!

ఆంధ్రప్రదేశ్ పబ్లిక్ సర్వీస్ కమిషన్ (ఏపీపీఎస్సీ) ఈ నెల 25న గ్రూప్ 2 పరీక్షలు నిర్వహిస్తోంది. రాష్ట్రంలో ఖాళీగా ఉన్న 899పోస్టుల భర్తీ కోసం ఈ పరీక్షలు నిర్వహిస్తోంది. వీటికి సంబంధించిన హాల్ టికెట్లు కూడా విడుదలయ్యాయి. వీటి ప్రకారం ఈ నెల 25న గ్రూప్ 2 ప్రిలిమ్స్ పరీక్ష జరగాల్సి ఉంది. ఈలోపే గ్రూప్ 2 పరీక్ష రాస్తున్న అభ్యర్ధులకు ఓ చిక్కు వచ్చి పడింది. తాజాగా స్టేట్ బ్యాంక్ ఆఫ్ ఇండియా (ఎస్బీఐ) పీవో ఉద్యోగాల కోసం నిర్వహిస్తున్న ప్రిలిమ్స్ పరీక్ష పూర్తయి మెయిన్స్ జరగాల్సి ఉంది.

స్టేట్ బ్యాంక్ ఆఫ్ ఇండియా (ఎస్బీఐ) పీవో ఉద్యోగాల కోసం నిర్వహించిన ప్రిలిమ్స్ పరీక్షలో అర్హత సాధించిన అభ్యర్ధులకు ఈ నెల 25నే మెయిన్స్ పరీక్ష కూడా నిర్వహించాలని బ్యాంక్ నిర్ణయం తీసుకుంది. దీంతో ఒకే రోజు ఏపీపీఎస్సీ గ్రూప్ 2 ప్రిలిమ్స్ పరీక్షతో పాటు ఎస్బీఐ మెయిన్ పరీక్ష కూడా జరగబోతోంది. ఈ నేపథ్యంలో రెండు పరీక్షలకు దరఖాస్తు చేసుకున్న అభ్యర్ధులు ఇప్పుడు ఏ పరీక్ష రాయాలో తెలియని పరిస్ధితి నెలకొంది.

ఏపీలో నిరుద్యోగులు నాలుగేళ్లుగా ప్రభుత్వ ఉద్యోగాల కోసం ఎదురుచూస్తున్నారు. తాజాగా ఏపీపీఎస్సీ ఎన్నికల వేళ గ్రూప్ 2 నోటిఫికేషన్ జారీ చేసింది. ఇందులో ప్రిలిమ్స్ పరీక్షను ఈ నెల 25న నిర్వహిస్తున్నారు. అదే సమయంలో ఎస్బీఐ పీవో మెయిన్స్ పరీక్ష కూడా జరగనుండటంతో ఇందులో గ్రూప్ 2 పరీక్ష వాయిదా వేయాలని అభ్యర్ధులు కోరుతున్నారు. ఇప్పుడు ఎస్బీఐ ప్రిలిమ్స్ క్వాలిఫై అయిన వారు మెయిన్ పరీక్ష తప్పనిసరిగా రాయాల్సి ఉంటుంది. కాబట్టి గ్రూప్ 2 ప్రిలిమ్స్ ను ప్రభుత్వం వాయిదా వేస్తుందని ఆశిస్తున్నారు.

English summary

candidates who are attending appsc group2 preliminary exam and SBI P.O mains exam are facing trouble as both are fall on same date feb 25.