బెజ.. బెజవాడ: పురంధేశ్వరి టు జనసేన (పిక్చర్స్)

By Srinivas

Published: Sunday, March 23, 2014, 16:24 [IST]

హైదరాబాద్/విజయవాడ: రాష్ట్రంలో మల్కాజిగిరి సీటు హాట్‌గా మారిన విషయం తెలిసిందే. మల్కాజిగిరి లోకసభ స్థానంతో పాటు విజయవాడ పార్లమెంటు నియోజకవర్గం కూడా హాట్ కేక్ అవుతోంది. విజయవాడ నుండి పోటీ చేసేందుకు పలు పార్టీల నుండి పలువురు నేతలు ఆసక్తి కనబరుస్తున్నారు.

బిజెపిలో చేరిన తర్వాత మాజీ కేంద్రమంత్రి దగ్గుబాటి పురంధేశ్వరి విజయవాడ పైన మరింత దృష్టి సారించారంటున్నారు. టిడిపి విజయవాడ లోకసభ అభ్యర్థిగా కేశినేని నాని దాదాపు ఖరారయ్యారు. ఆయనకు చంద్రబాబు నుండి హామీ కూడా లభించింది. అయితే, ఎన్నికల ముందు టిడిపిలో కొత్త పేర్లు తెర పైకి వస్తున్నాయి.

ఎన్నారై కోమటి జయరాం ఆదివారం చంద్రబాబును కలిశారు. ఆయన విజయవాడ లోకసభ టిక్కెట్ అడుగుతున్నట్లుగా తెలుస్తోంది. వల్లభనేని వంశీ కూడా రేసులో ఉన్నారు. మరోవైపు కేంద్ర జౌళీశాఖ మంత్రి కావూరి సాంబశివ రావు కూడా టిడిపిలోకి వస్తారనే ప్రచారం జరిగినా అది కుదరని పని అని అర్థమైపోయింది. అయితే, ఆయన మాత్రం విజయవాడ టిక్కెట్ కోసం టిడిపి తరఫున ప్రయత్నాలు చేస్తున్నారట. పవన్ కళ్యాణ్ జనసేన పార్టీ తరఫున పొట్లూరి వరప్రసాద్ పేరు వినిపిస్తున్న విషయం తెలిసిందే.

తెలుగుదేశం

విజయవాడ లోకసభ టిక్కెట్ కోసం టిడిపి, బిజెపిలలో పోటా పోటీ నెలకొంది. టిడిపి నుండి ఇద్దరు అంతకంటే ఎక్కువ మంది రేసులో ఉన్నారు. కేశినేని నానికి హామీ వచ్చినప్పటికీ ఆయనతో పాటు వల్లభనేని వంశీ, కోమటి జయరాంలు ఉన్నారు.

బిజెపి

భారతీయ జనతా పార్టీ తరఫున మాజీ కేంద్రమంత్రి దగ్గుబాటి పురంధేశ్వరి బెజవాడ బరిలో దిగాలను చూస్తున్నారట. ఇటీవల ఆమె స్థానిక నేతలతో వరుసగా భేటీ అవుతున్నారంటున్నారు.

జనసేన

పవర్ స్టార్ పవన్ కళ్యాణ్ జనసేన పార్టీ తరఫున పొట్లూరి వరప్రసాద్ విజయవాడ టిక్కెట్ ఆశిస్తున్నారు. ఆయన ఆ టిక్కెట్ కోసమే పవన్ పక్కన చేరి పార్టీ పెట్టించారనే ఆరోపణలు వచ్చిన వియం తెలిసిందే.

పొత్తు పొడిస్తే...

బిజెపి, తెలుగుదేశం, జనసేన పార్టీల మధ్య పొత్తు కుదిరితే బెజవాడ లోకసభ టిక్కెట్ ఇంకా హాట్‌గా మారే అవకాశముంది. టిడిపి నుండి ముగ్గురు నలుగురు, బిజెపి నుండి పురంధేశ్వరి, జనసేన నుండి పొట్లూరి టిక్కెట్ ఆశిస్తున్నందున... పొత్తు కుదిరితే ఎవరికి దక్కుతుందనేది ఆసక్తికరంగా మారింది.

Published On March 23, 2014