జెండా పీకేస్తారు: జగన్ నిర్ణయంపై భారత్ ఏక్తా ఆగ్రహం

హైదరాబాద్: మంత్రుల బృందం(జివోఎం) సమావేశానికి వెళ్లకుంటే వైయస్సార్ కాంగ్రెసు పార్టీ జెండాను సీమాంధ్రలో కూడా పీకేస్తారని భారత్ ఏక్తా ఆందోళన్ కన్వీనర్ మల్లు రమేష్ ఆదివారం ఓ ప్రకటనలో హెచ్చరించారు. సీమాంధ్రలో ఆ పార్టీ బతికి బట్టకట్టాలంటే జివోఎం సమావేశానికి వెళ్లాలన్నారు.

జివోఎం సమావేశాన్ని బహిష్కరించాలని ఆ పార్టీ తీసుకున్న నిర్ణయం ఆ పార్టీ ద్వంద్వ నీతికి నిదర్శనమని పేర్కొన్నారు. ఇడుపులపాయ ప్లీనరీలో తెలంగాణకు వ్యతిరేకం కాదని చెప్పిన జగన్ ఇప్పుడు జివోఎంను బహిష్కరిస్తామని చెప్పడం వారి దిగజారుడుతనానికి నిదర్శనమన్నారు.

నిలకడలేని విధానాలతో ఆ పార్టీ ప్రజల్లో చులకన అవుతుందన్నారు. సమైక్యాంధ్రకే తాము కట్టుబడి ఉన్నామని, కేంద్రం త్వరలో ఏర్పాటు చేయనున్న అఖిలపక్ష సమావేశానికి వ్యతిరేకిస్తున్నామని చెప్పడం ద్వారా ఆ పార్ట అధ్యక్షుడు వైయస్ జగన్ చరిత్రహీనుడిగా మిగిలిపోవడం ఖాయమన్నారు.

కాగా, విభజనకు తమ పార్టీ వ్యతిరేకమని జగన్ కేంద్ర ప్రభుత్వానికి లేఖ రాసిన విషయం తెలిసిందే. పార్టీ నేతలు మైసూరా రెడ్డి, కొణతాల రామకష్ణ ఆ లేఖను ఆదివారం పత్రికలకు విడుదల చేశారు. తమ పార్టీ సమైక్యాంధ్రకే కట్టుబడి ఉందని, ఎలాంటి విభజనకైనా తాము వ్యతిరేకమని ఆ లేఖలో జగన్ స్పష్టం చేశారు. రాష్ట్రాన్ని విభజించాలంటూ అక్టోబర్ 3న కేంద్ర మంత్రివర్గం తీసుకున్న నిర్ణయాన్ని తాము అంగీకరించబోమన్నారు.

English summary

The Bharat Ekta Andolan chief Mallu Ramesh on Sunday fired at YSR Congress Party chief YS Jaganmohan Reddy for boycott GoM.