పెట్రోల్‌పై పన్ను రద్దు, డీజిల్‌పై పెరిగిన సుంకం! తక్షణమే అమలులోకి..
అంతర్జాతీయ చమురు మార్కెట్‌లో హెచ్చుతగ్గులు, పశ్చిమాసియా సంక్షోభ పరిస్థితుల వేళ కేంద్ర ప్రభుత్వం ఇంధన ఎగుమతుల నిబంధనలపై కీలక నిర్ణయం తీసుకుంది. దేశీయంగా పెట్రోల్, డీజిల్ కొరత రాకుండా చూసేందుకు ఎప్పటికప్పుడు సమీక్షలు నిర్వహించే కేంద్ర ఆర్థిక మంత్రిత్వ శాఖ, తాజాగా సవరించిన ప్రత్యేక అదనపు ఎక్సైజ్ సుంకాల (SAED) వివరాలను విడుదల చేసింది. ఈ నూతన మార్గదర్శకాల ప్రకారం పెట్రోల్ ఎగుమతులపై విధిస్తున్న పన్నును పూర్తిగా రద్దు చేయగా.. డీజిల్, విమాన ఇంధనం (ATF) ఎగుమతులపై పన్ను భారాన్ని పెంచింది. ఈ నిర్ణయాలు తక్షణమే అమలులోకి వచ్చాయని అధికారిక గెజిట్ నోటిఫికేషన్‌లో స్పష్టం చేసింది.
పెట్రోల్‌కు వెసులుబాటు.. డీజిల్‌పై పెరిగిన సుంకం!
తాజా ఉత్తర్వుల ప్రకారం, ఇప్పటివరకు లీటర్ పెట్రోల్ ఎగుమతిపై ఉన్న రూ. 2.50 ప్రత్యేక అదనపు ఎక్సైజ్ సుంకాన్ని సున్నాకు తగ్గించారు. అంటే ఇకపై పెట్రోల్ ఎగుమతులపై ఎలాంటి అదనపు సుంకం ఉండదు. అదే సమయంలో హైస్పీడ్ డీజిల్ ఎగుమతులపై లీటరుకు రూ. 8.50గా ఉన్న పన్నును ఏకంగా రూ. 11.50కి పెంచారు. దేశీయంగా డీజిల్ లభ్యతను పెంపొందించడం, ఎగుమతులను నిరోధించడమే లక్ష్యంగా ఈ సుంకాన్ని భారీగా పెంచినట్లు తెలుస్తోంది.
విమాన ఇంధనంపై మరింత భారం!
కేవలం డీజిల్ మాత్రమే కాకుండా విమానాల్లో ఉపయోగించే ఏవియేషన్ టర్బైన్ ఫ్యూయల్ (ATF) ఎగుమతులపై కూడా కేంద్రం సుంకాన్ని సవరించింది. ఇప్పటివరకు లీటర్ ఏటీఎఫ్‌పై రూ. 10.50గా ఉన్న అదనపు పన్నును రూ. 11కి పెంచుతూ కేంద్ర రెవెన్యూ శాఖ ప్రత్యేకాజ్ఞలు జారీ చేసింది. అంతర్జాతీయ స్థాయిలో ఇంధన ధరల ఊగిసలాట దృష్ట్యా ఈ స్వల్ప పెంపు తప్పలేదని అధికారులు వెల్లడించారు.
పదిహేను రోజులకోసారి సమీక్ష!
ఈ ఏడాది మార్చి నెలలో పశ్చిమాసియాలో తలెత్తిన ఉద్రిక్తతల కారణంగా ఇంధన సరఫరాలో అనిశ్చితి ఏర్పడింది. ఆ సమయంలో స్వదేశీ మార్కెట్లలో కొరత రాకుండా ఉండేందుకు కేంద్ర ప్రభుత్వం మొదటిసారిగా పెట్రోల్, డీజిల్, ఏటీఎఫ్‌లపై ఎగుమతి సుంకాలను తీసుకొచ్చింది. నాటి నుంచి ప్రతి పక్షం రోజులకు ఒకసారి (Fortnightly) అంతర్జాతీయ చమురు ధరలు, ముడి చమురు సగటు విలువల ఆధారంగా ఈ రేట్లను సమీక్షిస్తూ వస్తున్నారు. ఇందులో భాగంగానే అక్టోబర్ 16న చేసిన సమీక్ష తర్వాత, తాజాగా ఈ మార్పులు చేపట్టినట్లు ప్రభుత్వం పేర్కొంది.
Click it and Unblock the Notifications
Sign in with Google
