గంటలో రూ.34,050 లాభం తెచ్చి పెట్టిన బంగారం
దేశంలో బంగారం ధరలు రికార్డు స్థాయికి చేరుకున్నాయి. ఈ ఏడాది గడిచిన 253 రోజుల్లో 10 గ్రాముల బంగారం ధర ఏకంగా రూ.34,050 పెరిగి, ప్రస్తుతం రూ.1,12,750కు చేరింది. ఈ పెరుగుదల బంగారం పెట్టుబడిదారులకు 43.12% రాబడిని ఇచ్చింది.
పండుగలకు, శుభకార్యాలకు బంగారం కొనుగోలు తప్పనిసరి అయిన భారతీయ మహిళలకు ఈ ధరల పెరుగుదల ఆందోళన కలిగిస్తోంది. అయితే, నిపుణుల అంచనాల ప్రకారం, దీపావళి నాటికి బంగారం ధరలు మరింత పెరిగి రూ.1.25 లక్షలకు చేరే అవకాశం ఉంది.
బంగారం ధరలు పెరగడానికి కారణాలు ఏమిటి?
బంగారం ధరలు అసాధారణంగా పెరగడానికి అనేక అంతర్జాతీయ కారణాలు ఉన్నాయని నిపుణులు చెబుతున్నారు.
కేంద్ర బ్యాంకుల కొనుగోళ్లు: ప్రపంచవ్యాప్తంగా వివిధ దేశాల కేంద్ర బ్యాంకులు పెద్ద మొత్తంలో బంగారాన్ని కొనుగోలు చేస్తుండడం.
బలహీనపడిన డాలర్: అమెరికన్ డాలర్ ఇండెక్స్ ఏడు వారాల కనిష్ట స్థాయికి పడిపోవడం. దీనివల్ల డాలర్ విలువ తగ్గడం, బంగారంలో పెట్టుబడులు పెరగడం.
రాజకీయ అనిశ్చితులు: మధ్యప్రాచ్యంలో ఉద్రిక్తతలు, రష్యాపై అమెరికా ఆంక్షలు, ఫ్రాన్స్, జపాన్లలో రాజకీయ సంక్షోభం వంటి భౌగోళిక రాజకీయ అనిశ్చితులు బంగారానికి సురక్షితమైన పెట్టుబడిగా ప్రాధాన్యతను పెంచాయి.
వడ్డీ రేట్లలో కోతలు: యుఎస్ ఫెడరల్ రిజర్వ్ వడ్డీ రేట్లను తగ్గించే అవకాశం ఉండడం. దీని వల్ల పెట్టుబడిదారులు వడ్డీ రేటు లేని బంగారాన్ని ఆశ్రయిస్తున్నారు.
వెండి ధరలు తగ్గుముఖం:
బంగారం ధరలు పెరుగుతున్నప్పటికీ, వెండి ధరలు మాత్రం తగ్గుముఖం పట్టాయి. నిపుణుల అభిప్రాయం ప్రకారం, రాబోయే రోజుల్లో అమెరికా ఆర్థిక విధానాలు, భౌగోళిక రాజకీయ పరిస్థితులు బంగారం ధరలపై తీవ్ర ప్రభావం చూపనున్నాయి. ప్రజల పెట్టుబడుల పోర్ట్ఫోలియోలో బంగారం ఒక ముఖ్యమైన భాగంగా మారుతోందని నిపుణులు విశ్లేషిస్తున్నారు.
ఈ అనూహ్య పెరుగుదల నేపథ్యంలో, బంగారంలో పెట్టుబడులు పెట్టేవారు , కొనుగోలుదారులు రాబోయే రోజుల్లో మార్కెట్ పరిస్థితులను నిశితంగా గమనించాలి.
Click it and Unblock the Notifications
Sign in with Google