ట్రంప్-మోదీ డీల్ మ్యాజిక్: భారీగా తగ్గనున్న ధరలు!

Updated: Tuesday, February 3, 2026, 12:53 [IST]

Trump-Modi Trade Deal: భారత్-అమెరికా మధ్య కుదిరిన హిస్టారికల్ ట్రేడ్ డీల్ భారతీయ వినియోగదారులకు, ఎగుమతిదారులకు భారీ ఊరటనిస్తోంది. అమెరికా అధ్యక్షుడు డొనాల్డ్ ట్రంప్, భారత ప్రధాని నరేంద్ర మోదీ మధ్య జరిగిన చర్చల ఫలితంగా ఫిబ్రవరి 3న ఓ కీలక ఒప్పందం కుదిరింది. అమెరికా తన సుంకాలను తగ్గించడమే కాకుండా భారత్ కూడా అమెరికన్ ఉత్పత్తులపై సుంకాలను తగ్గించడానికి అంగీకరించింది. దీనివల్ల సామాన్యులకు ఉపయోగపడే అనేక వస్తువుల ధరలు దిగిరానున్నాయి.

భారత్ లో ధరలు తగ్గనున్న వస్తువులు ఇవే..

ఒప్పందం ప్రకారం.. అమెరికా నుంచి దిగుమతి చేసుకునే వస్తువులపై భారత్ తన సుంకాలను జీరో స్థాయికి తగ్గించే దిశగా అడుగులు వేస్తోంది. దీని వల్ల కింది వస్తువుల ధరలు తగ్గే అవకాశం ఉంది.

టెక్ గ్యాడ్జెట్లు: అమెరికన్ బ్రాండ్లకు చెందిన ల్యాప్‌టాప్‌లు, టాబ్లెట్లు, హై-ఎండ్ స్మార్ట్‌ఫోన్లు(ఐఫోన్ వంటివి), కంప్యూటర్ హార్డ్‌వేర్ విడిభాగాల ధరలు తగ్గవచ్చు.

వ్యవసాయ ఉత్పత్తులు: అమెరికా నుంచి వచ్చే వాల్‌నట్స్ (అక్రోట్లు), బాదం, పప్పుధాన్యాలు (పప్పులు), అమెరికా యాపిల్స్ ధరలు తగ్గే అవకాశం ఉంది.

డైరీ, ప్యాకేజ్డ్ ఫుడ్: చీజ్, మిల్క్ పౌడర్ వంటి డైరీ ఉత్పత్తులతో పాటు అమెరికన్ ప్యాకేజ్డ్ ఫుడ్ ఐటమ్స్ అందుబాటులోకి రానున్నాయి.

లగ్జరీ వస్తువులు: హార్లే డేవిడ్సన్ వంటి ప్రీమియం మోటార్ సైకిళ్లు, విదేశీ బ్రాండెడ్ దుస్తుల ధరలు తగ్గే ఛాన్స్ ఉంది.

Trump Modi Trade Deal Laptops Gadgets and Dairy to Get Cheaper US Tariffs Slashed to 18 Percent

ఒప్పందానికి ప్రధాన కారణం
ఈ ఒప్పందం వెనుక ఒక కీలక దౌత్యపరమైన మలుపు ఉంది. రష్యా నుంచి ముడి చమురు కొనుగోళ్లను భారత్ నిలిపివేస్తుందని.. దానికి బదులుగా అమెరికా లేదా వెనిజులా నుంచి చమురు కొనుగోలు చేస్తుందని అమెరికా అధ్యక్షుడు డొనాల్డ్ ట్రంప్ ప్రకటించారు. రష్యాపై ఆధారపడటం తగ్గించాలనే షరతుతోనే అమెరికా ఈ టారిఫ్ తగ్గింపులకు అంగీకరించింది.

భారత ఎగుమతులకు లబ్ధి

అమెరికా విధించిన 50 శాతం సుంకం(25% సాధారణ + 25% పెనాల్టీ) ఇప్పుడు 18 శాతానికి తగ్గింది. దీనివల్ల అమెరికాకు ఎగుమతి అయ్యే కొన్ని భారతీయ వస్తువులకు డిమాండ్ పెరగనుంది. ఆ వస్తువులు ఏంటంటే..?

టెక్స్‌టైల్స్, గార్మెంట్స్: భారతీయ దుస్తుల ధరలు అమెరికాలో తగ్గుతాయి.

జెమ్స్, జ్యువెలరీ: వజ్రాలు, బంగారు ఆభరణాల ఎగుమతిదారులకు భారీ లాభం.

ఫార్మా: భారతీయ మందులు అమెరికా మార్కెట్లో మరింత పోటీనిస్తాయి.

ఇంకా ఖరీదుగా ఉండేవి ఏవి?
అన్ని వస్తువుల ధరలు తగ్గవు. కొన్ని పారిశ్రామిక ఉత్పత్తులపై ఇంకా అధిక సుంకాలు కొనసాగుతున్నాయి. స్టీల్, అల్యూమినియంపై అమెరికా సెక్షన్ 232 కింద విధించిన 50 శాతం సుంకాలు ఇంకా కొనసాగే అవకాశం ఉంది. కొన్ని ఆటోమొబైల్ పార్ట్స్‌పై 25 శాతం సుంకం కొనసాగవచ్చు. మరోవైపు ఈ చారిత్రాత్మక వాణిజ్య ఒప్పందం వల్ల భారత ఐటీ, ఎగుమతి రంగాలు బలోపేతం కావడమే కాకుండా ఎలక్ట్రానిక్స్ ప్రియులకు, గృహిణులకు ధరల భారం తగ్గనుంది.