ఓ వైపు ధార్ గ్యాంగ్.. మరోవైపు భవారియా గ్యాంగ్.. హైదరాబాద్ లో దొంగ.. దొంగ!!

హైదరాబాద్ నగరం భయం గుప్పెట్లో వణికి పోతుంది. ఎప్పుడు ఎక్కడ ఏం జరుగుతుందో అర్థం కాని పరిస్థితి ఉంది. ఓవైపు ధార్ గ్యాంగ్ నగరంలోని కొన్ని శివారు ప్రాంతాలలో తిరుగుతోందని ప్రజలు అప్రమత్తంగా ఉండాలని పోలీసులు ప్రకటించారు. ఇక ఇదే సమయంలో భవారియా గ్యాంగ్ కూడా రంగంలోకి దిగి చోరీలకు పాల్పడటం హైదరాబాద్ వాసులను భయభ్రాంతులకు గురి చేస్తుంది.

హడలెత్తిస్తున్న ధార్ గ్యాంగ్
మధ్యప్రదేశ్ లోని ధార్ గ్యాంగ్ గుంపులుగా చోరీలకు పాల్పడతారు. ఈ గ్యాంగ్ ఒకేసారి నాలుగైదు ఇళ్ళలో చోరీ చేస్తుంది. హయత్ నగర్ పోలీస్ స్టేషన్ పరిధిలోని ప్రజయ్ గల్మోహర్ గేటెడ్ కమ్యూనిటీలో ఒకేసారి నాలుగు ఇళ్ళలో చోరీకి పాల్పడింది. ధార్ గ్యాంగ్ చోరీ చేసినట్టు చెప్పిన పోలీసులు హయత్ నగర్, అబ్దుల్లాపూర్ మెట్, ఘట్ కేసర్ పోలీస్ స్టేషన్ల పరిధిలోని ప్రజలు అప్రమత్తంగా ఉండాలని హెచ్చరికలు జారీ చేశారు.

భయపెడుతున్న భవారియా గ్యాంగ్
ఇది మర్చిపోకముందే తాజాగా హైదరాబాద్ నగరంలో భవారియా గ్యాంగ్ హల్చల్ చేస్తోందని వీరు కూడా నగర శివారు ప్రాంతాలలో మకాం వేసినట్టు పోలీసులు అనుమానం వ్యక్తం చేస్తున్నారు. హైదరాబాద్ శివారు ప్రాంతాలైన జవహర్ నగర్, షామీర్ పీట, మెహదీపట్నం లో వరుస చైన్ స్నాచింగ్ లకు పాల్పడుతూ మహిళలను హడలెత్తిస్తున్నారని,అప్రమత్తంగా ఉండాలని సూచిస్తున్నారు.

రంగంలోకి ప్రత్యేక బృందాలు
ప్రత్యేక బృందాలతో వేట ప్రారంభించారు. ఇక దోపిడీ దొంగల ముఠాలు హైదరాబాద్ ప్రజలకు కంటిమీద కునుకు లేకుండా చేస్తున్నాయి. ద్విచక్ర వాహనాలను దొంగిలించి ఆ దొంగిలించిన ద్విచక్ర వాహనం పైన ముఠా సభ్యులు చైన్ స్నాచింగులకు పాల్పడుతున్నారు. 2023 లో కూడా హైదరాబాద్, రాచకొండ పోలీస్ స్టేషన్ల పరిధిలో ఇదే తరహాలో ద్విచక్ర వాహనంపై తిరుగుతూ మహిళల మెడ నుండి గొలుసులను ఎత్తుకెళ్లారు.

వణికిపోతున్న భాగ్యనగర వాసులు
ఇక ప్రస్తుతం ఈ ముఠా 4 చోరీలను చేసినట్టు గుర్తించిన పోలీసులు ఈ ముఠాను పట్టుకోవడం కోసం గాలింపు చర్యలు చేపట్టింది ప్రత్యేక బృందాలతో నగరాన్ని జల్లెడ పడుతోంది. ఒకవైపు హత్యలు, మరోవైపు దోపిడీ దొంగల ముఠాలతో భాగ్యనగర వాసులు భయం గుప్పిట్లో బ్రతుకుతున్నారు.

English summary

bhawaria gang and Dhar gang are targeting hyderabadis in hyderabad outskirts . police alerted those areas mainly outskirts with dhar and bhawaria gangs. special police teams are searching for the gangs.