దారుణం: ప్రియుడితో రేప్ చేయించి కోడలిని కాల్చేసింది

ఉదయ్‌పూర్: త్రిపుర రాష్ట్రంలోని గోమతి జిల్లా దారుణం జరిగింది. ఓ పదిహేనేళ్ల బాలికను ఆమె అత్త కిరోసిన్ పోసి నిప్పంటించి కాల్చేసింది. తన ప్రియుడు బాలికపై అత్యాచారం చేయగా, విషయం బయటపడుతుందన్న భయంతో బాలికను ఆమె కాల్చి చంపేసింది. ఈ ఘటన మంగళవారం రాత్రి ఉదయ్‌పూర్ జిల్లాలోని కాక్రాబోన్ ప్రాంతంలో చోటు చేసుకుంది.

కేసు నమోదు చేసుకున్న పోలీసులు, నిందితులైన బాధితురాలి అత్తను అరెస్ట్ చేశారు. పోలీసులు, బాధితురాలి తల్లిదండ్రుల కథనం ప్రకారం.. నిందితురాలు, బాధితురాలి అత్త మర్జీనా బిబికి స్వపన్ నమన్ అనే వ్యక్తితో అక్రమ సంబంధం ఉంది. ఈ విషయం ఆమె కోడలి(15)కి తెలిసింది. దీంతో ఆమెపై అత్యాచారం చేయాలని స్వపన్‌ను ప్రేరేపించింది అత్త.

ఈ నేపథ్యంలో స్వపన్ బాధిత బాలికపై అత్యాచారానికి పాల్పడ్డాడు. ఈ విషయం బయటికి ఎవరికైనా చెబుతుందేమోనని భయాందోళనకు గురైన మర్జీనా బిబి ఆమె కోడలిపై మంగళవారం రాత్రి కిరోసిన్ పోసి నిప్పంటించింది. దీంతో ఆమెకు తీవ్ర గాయాలయ్యాయి.

బాధితురాలి అరుపులు విన్న ఆమె కుటుంబసభ్యులు వెంటనే ఉదయ్‌పూర్ ఆస్పత్రికి తరలించారు. అనంతరం మెరుగైన చికిత్స కోసం అగార్తాలోని ఆస్పత్రికి తరలించారు. తీవ్ర గాయాల కారణంగా ఆమె బుధవారం మృతి చెందింది. బాధితురాలి తల్లిదండ్రుల ఫిర్యాదు మేరకు కేసు నమోదు చేసుకున్న పోలీసులు, నిందితురాలు మర్జీనా బిబిని అరెస్ట్ చేశారు. ఆమె ప్రియుడు స్వపన్ పరారీలో ఉన్నాడని, అతని కోసం గాలింపు చేపట్టినట్లు గోమతి ఎస్పి సుందరం చెప్పారు.

English summary

A 15-year-old girl was allegedly set on fire by her aunt in Kakrabon area of Gomati district for telling her parents that her aunt's lover had raped her, police said today.