మరోసారి రెచ్చిపోయిన ఉగ్రవాదులు: ఆర్మీ వాహనాలపై దాడి, నలుగురు జవాన్ల వీరమరణం

శ్రీనగర్: జమ్మూకాశ్మీర్‌​లో ఉగ్రవాదులు మరోసారి రెచ్చిపోయారు. పూంఛ్ జిల్లాలో గురువారం రెండు ఆర్మీ వాహనాలపై దాడి చేశారు. ఈ ఘటనలో నలుగురు జవాన్లు అమరులు కాగా, మరో ముగ్గురికి గాయాలయ్యాయి. రాజౌరీ-థనామండీ-సురన్​కోటె మార్గంలోని సావ్నీ ప్రాంతంలో గురువారం మధ్యాహ్నం 3.30 గంటలకు ఈ ఘటన జరిగిందని అధికారులు తెలిపారు.

బుఫ్లియాజ్ ప్రాంతంలో ఉగ్రవాదులు ఉన్నారన్న సమాచారం మేరకు భద్రతా దళాలు బుధవారం రాత్రి కార్డన్ సెర్చ్ ఆపరేషన్ ప్రారంభించాయి. ఈ సమయంలో జవాన్లను తరలిస్తున్న ఓ ట్రక్కు, జిప్సీ వాహనాలపై ఉగ్రవాదులు ఒక్కసారిగా కాల్పులకు తెగబడ్డారని అధికారులు తెలిపారు. ప్రస్తుతం ఉగ్రవాదులకు, ముష్కరులకు మధ్య ఎన్‌​కౌంటర్ కొనసాగుతోందని రక్షణ శాఖ పీఆర్ఓ కార్యాలయం తెలిపింది.

ఘటనాస్థలికి అదనపు బలగాలను తరలిస్తున్నట్లు పేర్కొంది. రాష్ట్రీయ రైఫిల్స్-48 పరిధిలో ఈ ఆపరేషన్ జరుగుతోందని ఆర్మీ అధికారులు తెలిపారు. నెల రోజుల వ్యవధిలో ఈ ప్రాంతంలో సైన్యంపై ఉగ్రదాడి జరగడం ఇది రెండోసారి కావడం గమనార్హం. అప్పుడు ఇద్దరు కెప్టెన్లు, ఇద్దరు జవాన్లు అమరులయ్యారు.

Visuals from Jammu and Kashmir's Poonch after terrorists ambushed two Army vehicles earlier today.

(Note: Viewer discretion is advised.)
(Note: Visuals deferred by unspecified time.) pic.twitter.com/k2ZnXHpP3t

— Press Trust of India (@PTI_News) December 21, 2023

కాగా, తాజాగా, 'ఉగ్రవాదులు ఉన్నారన్న నిఘా వర్గాల కచ్చితమైన సమాచారంతో బుధవారం రాత్రి జాయింట్ ఆపరేషన్ చేపట్టాం. ఆ ప్రాంతానికి అదనపు బలగాలను తరలిస్తున్నాం. ఆ సమయంలో ఉగ్రవాదులు ఆర్మీ వాహనాలపై కాల్పులు జరిపారు. బలగాలు దీటుగా స్పందించాయి' అని డిఫెన్స్ పీఆర్ఓ లెఫ్టినెంట్ కర్నల్ సునీల్ బర్త్​వాల్ వెల్లడించారు. ఉగ్రవాదులతో సైనికులు ముష్టి యుద్ధం కూడా చేశారని అధికార వర్గాల సమాచారం. దాడి తర్వాత ఉగ్రవాదులు సైనికుల ఆయుధాలతో పారిపోయారని తెలుస్తోంది.

English summary

4 Army Men Martyred As Terrorists Attack Army Vehicles In Jammu & Kashmir's Poonch.