పాక్‌కు వత్తాసు పలికిన ఎమ్మెల్యే అరెస్ట్.. దేశద్రోహం కేసు నమోదు!

జమ్మూ కాశ్మీర్‌లోని పహల్గాంలో జరిగిన హృదయవిదారక ఉగ్రదాడి దేశవ్యాప్తంగా తీవ్ర ఆగ్రహానికి దారితీసింది. అమాయక పౌరులపై జరిగిన ఈ దారుణ దాడిని యావత్ భారతావని ముక్తకంఠంతో ఖండించింది. ఈ నేపథ్యంలో, కేంద్ర ప్రభుత్వం పొరుగుదేశం పాకిస్థాన్‌పై కఠిన చర్యలు తీసుకుంటూ తన దృఢ సంకల్పాన్ని చాటింది.

ఈ పహల్గాం ఉగ్రదాడి దేశవ్యాప్తంగా సృష్టించిన ఆగ్రహ జ్వాలలు చల్లారకముందే, అస్సాంలో సంచలనం చోటుచేసుకుంది. అమాయకుల ప్రాణాలు బలిగొన్న ఈ ఘాతుక చర్య వెనుక పాకిస్థాన్ హస్తం ఉందని భారత్ బలంగా విశ్వసిస్తున్న వేళ, దాయాది దేశాన్ని వెనకేసుకొచ్చారనే తీవ్ర ఆరోపణలపై అస్సాంకు చెందిన ఏఐయూడీఎఫ్‌ ఎమ్మెల్యే అమీనుల్‌ ఇస్లాంను పోలీసులు అరెస్టు చేశారు. ఈ ఘటన రాజకీయంగా పెను దుమారం రేపుతోంది.

ఏం జరిగింది?

పహల్గాంలో యాత్రికులపై జరిగిన ఉగ్రదాడి యావత్ దేశాన్ని దిగ్భ్రాంతికి గురిచేసింది. ఈ దారుణానికి పాకిస్థాన్‌పై తీవ్ర స్థాయిలో నిరసనలు వ్యక్తమవుతున్నాయి. కేంద్ర ప్రభుత్వం కూడా దౌత్యపరంగా, ఇతర మార్గాల్లో పాక్‌పై ఒత్తిడి పెంచుతూ కఠిన చర్యలు తీసుకుంటోంది. ఇలాంటి కీలక తరుణంలో, అస్సాంకు చెందిన మంకాచార్ నియోజకవర్గ ఎమ్మెల్యే అమీనుల్ ఇస్లాం, పహల్గాం దాడి ఘటనలో పాకిస్థాన్‌ను, ఆ దేశ ప్రమేయాన్ని సమర్థిస్తున్నట్లుగా ఆరోపణలున్న ఓ వీడియో సోషల్ మీడియాలో వైరల్ అయింది.

సీఎం హిమంత సీరియస్.. తక్షణ చర్యలు
ఈ వీడియో ముఖ్యమంత్రి హిమంత బిశ్వ శర్మ దృష్టికి వెళ్లడంతో ఆయన తీవ్రంగా స్పందించారు. "పహల్గాం దాడి విషయంలో పాకిస్థాన్‌ను, ఆ దేశ ప్రమేయాన్ని సదరు ఎమ్మెల్యే సమర్థిస్తున్నట్లు వీడియోలో స్పష్టంగా ఉంది. ఇది క్షమించరాని నేరం. వెంటనే తగు చర్యలు తీసుకోవాలని పోలీసులను ఆదేశించాను. డీజీపీ గారు నన్ను సంప్రదించి, ఆయన్ను అరెస్టు చేసినట్లు ధృవీకరించారు," అని సీఎం మీడియా సమావేశంలో వెల్లడించారు. ఆయనపై దేశద్రోహం అభియోగాల కింద కేసు నమోదు చేసినట్లు తెలిపారు.

పాక్‌కు మద్దతిస్తే సహించేది లేదు..
సామాజిక మాధ్యమాలు సహా ఏ రూపంలోనైనా పాకిస్థాన్‌కు ప్రత్యక్షంగా గానీ, పరోక్షంగా గానీ మద్దతు పలికే చర్యలను ఎంతమాత్రం సహించేది లేదని సీఎం హిమంత బిశ్వ శర్మ హెచ్చరించారు. అలాంటి వారిపై తక్షణమే కఠిన చర్యలు తీసుకోవాలని పోలీసులకు స్పష్టమైన ఆదేశాలు జారీ చేసినట్లు ఆయన నొక్కి చెప్పారు. ఉగ్రవాదాన్ని, దేశ వ్యతిరేక శక్తులను ఉపేక్షించే ప్రసక్తే లేదని తేల్చిచెప్పారు.

అయితే ఈ వివాదంపై ఏఐయూడీఎఫ్ పార్టీ వెంటనే స్పందించింది. ఎమ్మెల్యే అమీనుల్ ఇస్లాం వ్యక్తిగత ప్రకటనతో పార్టీకి ఎలాంటి సంబంధం లేదని స్పష్టం చేసింది. ఉగ్రవాదం వంటి సున్నితమైన అంశాల్లో, క్లిష్ట పరిస్థితుల్లో తాము ఎల్లప్పుడూ ప్రభుత్వానికి, దేశానికి అండగా ఉంటామని పార్టీ నాయకత్వం ప్రకటించింది. మరోవైపు, పహల్గాం ఉగ్రదాడిలో ప్రాణాలు కోల్పోయిన వారి కుటుంబాలకు అస్సాం ప్రభుత్వం తరపున రూ.5 లక్షల చొప్పున ఆర్థిక సహాయం అందిస్తామని సీఎం హిమంత బిశ్వ శర్మ ప్రకటించారు.

భారత్ కఠిన చర్యలు
పహల్గాం దాడి తర్వాత పాకిస్థాన్‌పై భారత్ కఠిన వైఖరి అవలంభిస్తోంది. ఇప్పటికే సింధూ నదీ జలాల ఒప్పందం అమలును నిలిపివేస్తున్నట్లు ప్రకటించింది. అటారీ సరిహద్దును మూసివేసింది. వీసాల జారీని రద్దు చేసింది. అంతేకాకుండా, ఢిల్లీలోని పాకిస్థాన్ హైకమిషన్‌లో పనిచేస్తున్న ఆ దేశ సైనిక సిబ్బందిని తక్షణమే దేశం విడిచి వెళ్లాలని ఆదేశించడం పరిస్థితి తీవ్రతకు అద్దం పడుతోంది.

English summary

AIUDF MLA Aminul Islam Held in Assam After CM's Order Over Controversial Terror Attack Remarks,