Chandrayaan 3 landing: మోదీ వర్చువల్ వీక్షణం..?!
బెంగళూరు: ఇంకొన్ని గంటలే. భారత అంతరిక్ష పరిశోధన కేంద్రం ఇస్రో ప్రయోగించిన చంద్రయాన్ 3.. జాబిల్లి మీద అడుగుపెట్టబోతోంది. నిమిష నిమిషానికి చందమామకు చేరువగా వెళ్తోంది ఈ మాడ్యుల్. బుధవారం సాయంత్రం సరిగ్గా 6:04 నిమిషాలకు ఈ రెండూ చంద్రుడి దక్షిణధృవంపై ల్యాండ్ కానున్నాయి.
సాఫ్ట్ ల్యాండింగ్ కోసం ఇస్రో శాస్త్రవేత్తలు అన్ని ఏర్పాట్లు పూర్తి చేశారు. ఎప్పటికప్పుడు మాడ్యుల్ పనితీరును పర్యవేక్షిస్తోన్నారు. ల్యాండింగ్ సమయంలో ఎలాంటి పొరపాట్లకూ అవకాశం ఇవ్వదలచుకోలేదు. 2019లో ప్రయోగించిన చంద్రయాన్ 2 విఫలమైన నేపథ్యంలో.. ముందు జాగ్రత్త చర్యలను తీసుకున్నారు.
ఇప్పటివరకూ చంద్రయాన్ 3 పనితీరులో ఎలాంటి సాంకేతిక లోపాలు తలెత్తలేదు. దాని పనితీరు సంతృప్తికరంగా ఉంటోంది. చంద్రుడి ఉపరితలానికి మరింత చేరువైంది. ఈ మధ్యాహ్నానికి చంద్రుడి కక్ష్యలో 70 కిలోమీటర్ల ఎత్తున ఈ మాడ్యుల్ పరిభ్రమిస్తోంది. చందమామ ఆర్బిట్లో ఉన్న చంద్రయాన్ 2 ఆర్బిటర్తోనూ అనుసంధానమైంది.
సాఫ్ట్ ల్యాండింగ్ కోసం దేశం మొత్తం ఉత్కంఠతగా ఎదురు చూస్తోంది. గతంలో ఎదురైన చేదు సంఘటనలు పునరావృతం కాకూడదని యావత్ దేశం కోరుకుంటోంది. చంద్రయాన్ 3 సాఫ్ట్ ల్యాండింగ్ కావాలని కోరుతూ పలువురు ఇవ్వాళ పలు ఆలయాల్లో ప్రత్యేక పూజలు చేశారు. మసీదుల్లో ప్రార్థనలు జరిపారు.
బ్రిక్స్ సమ్మిట్లో పాల్గొనడానికి దక్షిణాఫ్రికాలోని జొహాన్నెస్బర్గ్కు వెళ్లిన ప్రధానమంత్రి నరేంద్ర మోదీ సైతం చంద్రయాన్ 3 ల్యాండింగ్ పట్ల ఉత్కంఠతగా ఎదురు చూస్తోన్నారు. వర్చువల్ విధానంలో ఆయన ల్యాండింగ్ ప్రక్రియను వీక్షించే అవకాశం ఉన్నట్లు తెలుస్తోంది. దీనికి సంబంధించిన ఏర్పాట్లు ఇప్పటికే పూర్తయ్యాయని ప్రధానమంత్రి కార్యాలయం తెలిపింది.
Click it and Unblock the Notifications
Sign in with Google