Gangatic dolphin : యూపీ జలజంతువుగా గంగానది డాల్ఫిన్లు-యోగీ ఆదిత్యనాథ్ ప్రకటన..

ఉత్తర్ ప్రదేశ్ ప్రభుత్వం తాజాగా కీలక నిర్ణయం తీసుకుంది. రాష్ట్ర జలచరంగా గంగానది డాల్ఫిన్లను ఎంపిక చేస్తూ యోగీ ఆదిత్యనాథ్ నేతృత్వంలోని బీజేపీ సర్కార్ నిర్ణయించింది. ఈ మేరకు సీఎం యోగీ ఆదిత్యనాథ్ ఓ ప్రకటన చేశారు. చెరువులు, నదుల స్వచ్ఛతను కాపాడుకోవాల్సిన అవసరాన్ని యోగీ గుర్తుచేశారు. ఈ డాల్ఫిన్లు గంగా, యమునా, చంబల్, ఘఘ్రా, రాప్తి , గెరువా నదులలో కనిపిస్తాయన్నారు.ఉత్తరప్రదేశ్‌లో గంగా డాల్ఫిన్‌ల జనాభా సుమారు 2 వేలుగా అంచనా వేశారు.

యూపీలో పర్యాటకులు, స్థానిక నివాసితులు ప్లాస్టిక్‌ వాడకాన్ని నియంత్రించాల్సిన అవసరం ఉందని సీఎం యోగీ ఆదిత్యనాథ్ తెలిపారు. మన తాగునీరు, ప్రకృతికి ప్లాస్టిక్ తీవ్ర హాని కలిగిస్తుందన్నారు. వన్యప్రాణులతో ఎలా సంభాషించాలో స్థానికులకు శిక్షణ ఇవ్వాల్సిన అవసరం ఉందని యోగీ తెలిపారు. ఉపాధి అవకాశాలను సృష్టించడం , సమాజంలో అవగాహన పెంచడం లక్ష్యంగా టైగర్ రిజర్వ్‌కు అనుసంధానం చేసిన గ్రామాల వారికి మార్గదర్శకులుగా శిక్షణ ఇవ్వాలని ఆయన ప్రతిపాదించారు.

ఇటీవల ఉత్తరప్రదేశ్‌లోని హాపూర్ జిల్లాలోని గర్ గంగాలో వరల్డ్ వైడ్ ఫండ్ ఫర్ నేచర్ (WWF), అటవీ శాఖ బృందాలు జీపీఎస్ సహాయంతో డాల్ఫిన్‌లను లెక్కిస్తున్నాయి. గర్ గంగాలో కొనసాగుతున్న డాల్ఫిన్ గణనపై డీఎఫ్వో సంజయ్ కుమార్ మాల్ వివరాలు వెల్లడించారు. "మేరీ గంగా మేరీ డాల్ఫిన్ 2023" పేరుతో దీనిపై ప్రచారం చేస్తున్నట్లు ఆయన తెలిపారు. దీని కింద ముజఫర్‌పూర్ బ్యారేజీ దగ్గర నుండి మొత్తం నరోరా బ్యారేజీ వరకు గంగా నదిలో డాల్ఫిన్‌ల లెక్కింపు జరుగుతోందన్నారు.

ఇందులో డబ్ల్యూడబ్ల్యూఎఫ్‌, అటవీ శాఖ బృందాలు రెండూ జాయింట్‌ యాక్షన్‌ ద్వారా లెక్కింపు చేపడుతున్నారు. ఇందులో రెండు టీంలు చొప్పున గంటకు 10 కిలోమీటర్ల వేగంతో పరుగెత్తే విధంగా కౌంటింగ్‌ విధానం ఉందన్నారు. వాటి మధ్య 10 నిమిషాల గ్యాప్ ఇచ్చారు. ముజఫర్‌పూర్ నుండి నరోరా బ్యారేజీ వరకు మొత్తం బృందం ఈ విరామంలో ఎన్ని డాల్ఫిన్‌లు డైవ్ చేస్తాయనేది గుర్తిస్తారు. ఆ బృందం డాల్ఫిన్ డైవింగ్‌ను చూసి దాని జీపీఎస్ లొకేషన్‌ను నమోదు చేస్తుంది. ఆపై మరొక బృందం వచ్చి దాని జీపీఎస్ లొకేషన్‌ను నమోదు చేస్తుంది. అది 10 నిమిషాల విరామం తర్వాత వస్తే అది అదే డాల్ఫిన్ అని చూపిస్తుంది, రాకపోతే ఆ తర్వాత అది మరో డాల్ఫిన్ కాబట్టి లెక్కింపు కూడా అదే విధంగా జరుగుతుందని తెలుస్తోంది.

English summary

Uttar Pradesh Chief Minister yogi adityanath has declared gangatic Dolphin As State Aquatic Animal.