Instagram పై కేంద్రం తీవ్ర ఆగ్రహం! ఏడు రోజుల్లోగా లెక్క తేలాలి
ప్రముఖ సోషల్ మీడియా దిగ్గజం 'మెటా' (Meta) సంస్థకు కేంద్ర ప్రభుత్వం గట్టి షాక్ ఇచ్చింది. ఇన్స్టాగ్రామ్ ప్లాట్ఫారమ్లో చిన్నారులపై లైంగిక దోపిడీని ప్రోత్సహించేలా కొన్ని క్రూరమైన ప్రకటనలు (యాడ్స్) రావడంపై కేంద్ర ప్రభుత్వం తీవ్ర ఆగ్రహం వ్యక్తం చేసింది. పిల్లలపై సాగే లైంగిక అరాచకాలకు (CSAE) సంబంధించిన కంటెంట్ను ప్రచారం చేసే ఇలాంటి అసాంఘిక ప్రకటనలు వెలుగులోకి రావడంతో.. కేంద్ర ఎలక్ట్రానిక్స్, సమాచార సాంకేతిక మంత్రిత్వ శాఖ (MeitY) మెటా సంస్థకు తీవ్ర హెచ్చరికలతో కూడిన నోటీసులు జారీ చేసింది. ఇటువంటి వివాదాస్పద ప్రకటనలను తక్షణమే నిలిపివేయాలని కేంద్రం స్పష్టం చేసింది.
శనివారం రాత్రి జారీ చేసిన ఈ నోటీసులో మెటా సంస్థ నుంచి కేంద్ర ప్రభుత్వం తక్షణ వివరణను డిమాండ్ చేసింది. పిల్లల లైంగిక వేధింపులను ప్రోత్సహించే కంటెంట్ లేదా దానికి దారితీసే అకౌంట్లకు సంబంధించిన పెయిడ్ యాడ్స్ అసలు ఇన్స్టాగ్రామ్లో ఎలా ఆమోదం పొందాయో చెప్పాలని నిలదీసింది. దీనిపై పూర్తి వివరాలతో కూడిన సమగ్ర నివేదికను ఏడు రోజుల్లోగా తమకు సమర్పించాలని ఆదేశించింది. సామాజిక మాధ్యమాల భద్రతా నిబంధనలను మెటా సంస్థ ఏ స్థాయిలో బేఖాతరు చేస్తోందో ఈ ఘటనే నిరూపిస్తోందని ఐటీ నిపుణులు అభిప్రాయపడుతున్నారు.
మంత్రి అశ్విని వైష్ణవ్ సీరియస్.. నిఘా పెట్టిన అధికారులు
కేంద్ర ఐటీ శాఖ మంత్రి అశ్విని వైష్ణవ్ ఆదేశాల మేరకు ఉన్నతాధికారులు రంగంలోకి దిగి మెటా సంస్థను గట్టిగా ప్రశ్నించారు. చిన్నారుల భద్రతకు సంబంధించిన అత్యంత సున్నితమైన అంశంలో ఇలాంటి ఘోరమైన వైఫల్యాలు ఎలా సంభవించాయనే దానిపై ప్రభుత్వం ప్రత్యేక దృష్టి సారించింది. ప్రకటనల ఆమోద ప్రక్రియను నిశితంగా పరిశీలించాలని, అటువంటి వివాదాస్పద అడ్వర్టైజ్మెంట్లను యాప్ నుంచి శాశ్వతంగా తొలగించాలని అధికారులను ఆదేశించారు.
సాధారణంగా తమ ప్లాట్ఫారమ్లలో ఇటువంటి కంటెంట్ను గుర్తించేందుకు ఆర్టిఫిషియల్ ఇంటెలిజెన్స్ (AI), ఆటోమేటెడ్ సిస్టమ్స్, హ్యూమన్ రివ్యూ వంటి ఎన్నో రక్షణ వ్యవస్థలను వాడుతున్నట్లు మెటా గతంలో గొప్పలు చెప్పుకుంది. అయితే ఈ భద్రతా వలయాలు పూర్తి స్థాయిలో పనిచేయడం లేదని తాజా ఉదంతం స్పష్టం చేస్తోంది. దీంతో తమ లోపాలను అంగీకరించిన మెటా.. మరిన్ని కఠిన చర్యలు చేపడుతున్నట్లు, అసంబద్ధ కంటెంట్ను ముందే నిలిపివేయడానికి సాంకేతిక సామర్థ్యాలను పెంచుతున్నట్లు పేర్కొంది.
మెటాకు చుట్టుముడుతున్న భద్రతా సవాళ్లు!
ఈ వారంలో కేంద్ర ప్రభుత్వం నుంచి మెటా సంస్థ ఎదుర్కొంటున్న రెండవ అతిపెద్ద భద్రతా సవాలుగా ఇది నిలిచింది. దీనికి కొద్ది రోజుల ముందే వాట్సాప్ ప్రవేశపెట్టనున్న 'యూజర్ నేమ్' (Username) ఫీచర్ పై సైతం కేంద్రం ఆందోళన వ్యక్తం చేసింది. దీని ద్వారా ఐడెంటిటీ దొంగతనాలు, సైబర్ మోసాలు పెరిగే ముప్పు ఉందంటూ పూర్తి సమాచారాన్ని సమర్పించాల్సిందిగా కేంద్రం నోటీసుల్లో కోరిన విషయం తెలిసిందే.
డిజిటల్ ప్లాట్ఫారమ్లలో భారతీయ పౌరుల భద్రత, ముఖ్యంగా చిన్నారుల సంరక్షణ విషయంలో రాజీపడే ప్రసక్తే లేదని కేంద్ర ఐటీ శాఖ తేల్చి చెప్పింది. దేశవ్యాప్తంగా సామాజిక మార్గదర్శకాలకు లోబడి ఇంటర్నెట్ సురక్షితంగా ఉండాలని కోరుకుంటోంది. నియంత్రణ నిబంధనలు ఉల్లంఘిస్తే తదుపరి ఎలాంటి కఠినమైన చట్టపరమైన చర్యలు తీసుకోవాలో ప్రభుత్వం మెటా నుంచి వచ్చే వివరణ ఆధారంగా నిర్ణయిస్తుంది.
Click it and Unblock the Notifications
Sign in with Google