కరూర్ తొక్కిసలాట ఘటనపై సీబీఐ దర్యాప్తు వరకు.. కీలక మలుపులివే!

Karur Stampede: సెప్టెంబర్ 27న తమిళగ వెట్రి కళగం(TVK) పార్టీ అధినేత, సినీ నటుడు విజయ్ కరూర్‌లో నిర్వహించిన ర్యాలీలో 41 మంది మరణించిన సంగతి తెలిసిందే. అసెంబ్లీ ఎన్నికలు జరగనున్న నేపథ్యంలో ఈ సభకు అనుమతికి మించి భారీ సంఖ్యలో అభిమానులు, కార్యకర్తలు తరలివచ్చారు.సభకు విజయ్ ఆలస్యంగా రావడంతో, ఆయనను చూసేందుకు జనం ఒక్కసారిగా ముందుకు దూసుకురావడం, అక్కడ అధిక రద్దీ ఉండటం వల్ల ఈ తొక్కిసలాట జరిగింది. కరూర్ జిల్లాలో జరిగిన తొక్కిసలాట ఘటనకు సంబంధించి ముఖ్య సంఘటనల కాలక్రమం తెలుసుకుందాం.

*సెప్టెంబరు 27, 2025 - ప్రముఖ నటుడు, తమిళగ వెట్రి కళగం (TVK) పార్టీ అధినేత విజయ్ నిర్వహించిన ప్రచార ర్యాలీలో భారీ రద్దీ, నిర్వాహణ లోపాల కారణంగా తొక్కిసలాట జరిగింది. ఈ ఘటనలో 39 మందికి పైగా (కొన్ని నివేదికల ప్రకారం 41) మరణించారు.

*సెప్టెంబరు 28, 2025 -తమిళనాడు ప్రభుత్వం ఈ దుర్ఘటనపై విచారణ చేపట్టడానికి ఏకసభ్య కమిషన్‌ను నియమించింది. తమిళనాడు ముఖ్యమంత్రి ఎంకే స్టాలిన్, ప్రధానమంత్రి నరేంద్ర మోదీ మృతుల కుటుంబాలకు ఎక్స్-గ్రేషియా ప్రకటించారు.

*సెప్టెంబరు 28-29, 2025- టీవీకే పార్టీ ఈ ఘటన వెనుక కుట్ర కోణం ఉందని ఆరోపించింది. పోలీసులు టీవీకే పార్టీకి చెందిన ముఖ్య నాయకులపై, నిర్వాహకులపై కేసు నమోదు చేసి, కొందరిని అరెస్ట్ చేశారు.

*సెప్టెంబరు 30, 2025 - వివిధ ఆస్పత్రుల్లో చికిత్స పొందుతున్న మరికొందరు చనిపోవడంతో మృతుల సంఖ్య 41కి చేరుకుంది.

*అక్టోబర్ 3, 2025- కుట్ర కోణంపై సీబీఐ దర్యాప్తు కోరుతూ టీవీకే వేసిన పిటిషన్‌ను మద్రాస్ హైకోర్టు తోసిపుచ్చింది. దీనికి బదులుగా ఘటనపై దర్యాప్తు చేసేందుకు సిట్ (SIT - ప్రత్యేక దర్యాప్తు బృందం) ఏర్పాటు చేయాలని ఆదేశించింది.

*అక్టోబర్ 13, 2025- మద్రాస్ హైకోర్టు ఉత్తర్వులపై విచారణ జరిపిన సుప్రీంకోర్టు, తొక్కిసలాట ఘటనపై సీబీఐ (CBI) దర్యాప్తునకు ఆదేశించింది. దర్యాప్తు పర్యవేక్షణకు సుప్రీంకోర్టు మాజీ న్యాయమూర్తి జస్టిస్ అజయ్ రస్తోగి నేతృత్వంలో కమిటీని ఏర్పాటు చేసింది. ఈ కమిటీ సీబీఐ దర్యాప్తును సంపూర్ణంగా పర్యవేక్షిస్తుందని తెలిపింది. సీబీఐకి ఆదేశాలు జారీ చేయడానికి, సేకరించిన సాక్ష్యాలను సమీక్షించడానికి ఈ కమిటీకి అధికారం ఉందని తెలిపింది.

*అక్టోబర్ 17, 2025-ఈ తేదీన టీవీకే అధ్యక్షుడు విజయ్ భారీ భద్రత మధ్య తొక్కిసలాట బాధితుల కుటుంబాలను కలవడానికి ప్రణాళికలు సిద్ధం చేసుకున్నారు.

English summary

The Karur stampede during TVK leader Vijay's rally on September 27 claimed 41 lives. Here's a chronological breakdown of major developments leading up to the Supreme Court’s order for a CBI investigation.