Bihar Election: బీహార్ లో మా సీఎం, డీసీఎంలు వీళ్లే-తేల్చేసిన మహాకూటమి..!

వచ్చే నెలలో రెండు దశల్లో జరగనున్న బీహార్ అసెంబ్లీ ఎన్నికల్లో ఎలాగైనా గెలిచి తీరాలన్న పట్టుదలతో దూసుకెళ్తున్న మహాకూటమి సీట్ల పంపకాల విషయంలో మాత్రం విమర్శలు ఎదుర్కొంది. ఈసారి మహాకూటమికి గెలుపు అవకాశాలు ఉన్నాయన్న అంచనాలతో భాగస్వామ్య పార్టీల మధ్య పోటీ పెరగడంతో స్నేహపూర్వక పోటీలకు కూడా సిద్దమైంది. దీంతో కూటమిలో కుమ్ములాటల్ని సొమ్ము చేసుకోవాలన్న అధికార ఎన్డీయేకు ఇవాళ షాక్ తగిలింది.

బీహార్ అసెంబ్లీ ఎన్నికల్లో తమ సీఎం, డిప్యూటీ సీఎం అభ్యర్ధుల్ని సైతం మహాకూటమి ప్రకటించింది. సీఎంగా ఆర్జేడీ నేత తేజస్వీ యాదవ్, డిప్యూటీ సీఎంగా వికాశ్ శీల్ ఇన్సాన్ పార్టీ నేత ముకేష్ సహానీని ప్రకటించింది. ఈ మేరకు కాంగ్రెస్ అగ్రనేత అశోక్ గెహ్లాట్ పాట్నాలో స్పష్టమైన ప్రకటన చేశారు. అంతే కాదు ఎన్డీయే తరఫున ముఖ్యమంత్రి అభ్యర్ధి ఎవరో ప్రకటించాలని బీజేపీ-జేడీయూకు సవాల్ కూడా విసిరారు. మహాకూటమి గెలిస్తే ఒకరి కంటే ఎక్కువ డిప్యూటీ సీఎంలు ఉంటారని వెల్లడించారు.

తనని బీహార్ ముఖ్యమంత్రి అభ్యర్ధిగా మహా కూటమి ఎంపిక చేయడం పట్ల తేజస్వీ యాదవ్ భాగస్వామ్య పార్టీలకు కృతజ్ఞతలు తెలిపారు. బీహార్‌ను పునర్నిర్మించడానికి మహాకూటమి కలిసి పనిచేస్తుందన్నారు. నితీష్ కుమార్ అన్యాయాన్ని ఎదుర్కొంటున్నారని, ఆయన ముఖ్యమంత్రి అభ్యర్ది అని ఇప్పటివరకూ ఎలాంటి ప్రకటనా రాలేదని గుర్తుచేశారు. ప్రతి ఎన్నికలకు ముందు నితీష్ కుమార్‌ను ముఖ్యమంత్రి అభ్యర్ధిగా ప్రకటించేవారని, ఈసారి అలా ఎందుకు చేయలేదని అమిత్ షాను తేజస్వీ ప్రశ్నించారు. ఇది నితీష్ కుమార్ చివరి ఎన్నికని అమిత్ షా ఇప్పటికే స్పష్టం చేశారన్నారు.

#WATCH | Former Bihar Deputy CM and RJD leader Tejashwi Yadav announced as Mahagathbandhan's CM face for #BiharAssemblyElections

Senior Congress leader Ashok Gehlot says, "...All of us sitting here have decided that in these elections, we support Tejashwi Yadav as the CM… pic.twitter.com/ghAi0tSDMm

— ANI (@ANI) October 23, 2025

బీహార్ లో మహా కూటమి సీట్ల సర్దుబాటు పూర్తి కాక ముందు తేజస్వీ యాదవ్ ను ముఖ్యమంత్రి అభ్యర్ధిగా ప్రకటిస్తే తమ డిమాండ్లు నెరవేరవని భావించిన కాంగ్రెస్..ఇప్పటివరకూ దీనిపై మౌనంగా ఉంది. సీట్ల పంపకాలు తేలిపోవడంతో ఇప్పుడు తేజస్వీని ముఖ్యమంత్రి అభ్యర్దిగా అంగీకరిస్తున్నట్లు ప్రకటించింది. దీంతో పాటు కూటమిలో విభేదాలు కూడా సమసిపోయినట్లు వెల్లడించింది. ఆర్జేడీతో పాటు చిన్న పార్టీల్ని కలుపుకుని ఈసారి బీహార్ లో ప్రభుత్వం ఏర్పాటు చేసి తీరుతామని కాంగ్రెస్ నేతలు చెప్తున్నారు.