విద్వేషప్రసంగాలపై కేసులు పెట్టండి-ఫిర్యాదుల్లేకపోయినా-రాష్ట్రాలకు సుప్రీంకోర్టు ఆదేశాలు..

దేశవ్యాప్తంగా నానాటికీ పెరిగిపోతున్న విద్వేష ప్రసంగాలు,వ్యాఖ్యలపై సుప్రీంకోర్టు ఇవాళ కీలక ఆదేశాలు జారీ చేసింది. గతంలోనే విద్వేష వ్యాఖ్యలు, ప్రసంగాలపై దాఖలైన పిటిషన్లపై విచారణ సందర్భంగా రాష్ట్రాలు, కేంద్రంపై తీవ్ర ఆగ్రహం వ్యక్తం చేసిన సుప్రీంకోర్టు.. ఇకపై ఇలాంటి వాటికి అడ్డుకట్ట వేసేందుకు వీలుగా కేసులు నమోదు చేయాలని ఆదేశించింది. అంతే కాదు ఫిర్యాదులతో సంబంధం లేకుండా కేసులు నమోదు చేయాలని కూడా సూచించింది.

ద్వేషపూరిత ప్రసంగాల కేసులపై స్వచ్ఛందంగా చర్యలు తీసుకోవాలని ఢిల్లీ, ఉత్తరప్రదేశ్, ఉత్తరాఖండ్ పోలీసులను ఆదేశిస్తూ గతేడాది జారీ చేసిన ఉత్తర్వుల పరిధిని సుప్రీంకోర్టు ఇవాళ పొడిగించింది. అన్ని రాష్ట్రాలు, కేంద్ర పాలిత ప్రాంతాలను విద్వేషంపై కేసులు నమోదు చేయాలని ఆదేశించింది. ఎవరూ ఫిర్యాదు చేయకపోయినా ప్రసంగాలపై కేసుల నమోదులో జాప్యం చేస్తే కోర్టు ధిక్కారంగా పరిగణిస్తామని హెచ్చరించింది.దీనిని తీవ్రమైన నేరంగా పేర్కొంటూ అత్యున్నత న్యాయస్థానం ద్వేషపూరిత ప్రసంగం దేశంలోని లౌకిక స్వరూపాన్ని ప్రభావితం చేసే అవకాశముందని పేర్కొంది.

దేశంలో ద్వేషపూరిత ప్రసంగాల నేరాలపై దాఖలైన పలు పిటిషన్లను సుప్రీంకోర్టు సుదీర్ఘంగా విచారించింది. ద్వేషపూరిత ప్రసంగాలపై చర్యలు తీసుకోవడంలో విఫలమైందని ఆరోపిస్తూ దాఖలైన ధిక్కార పిటిషన్‌పై సుప్రీం బెంచ్ ఇంతకుముందు మహారాష్ట్ర ప్రభుత్వం నుండి స్పందన కోరింది. ప్రసంగకర్త మతంతో సంబంధం లేకుండా చర్యలు తీసుకోవాల్సి ఉంటుందని సుప్రీంకోర్టు ఈ సందర్భంగా స్పష్టం చేసింది. తద్వారా రాజ్యాంగం ప్రవేశిక ద్వారా ఉద్దేశించిన భారతదేశం యొక్క లౌకిక స్వభావం పరిరక్షించబడుతుందని న్యాయమూర్తులు కేఎం జోసెఫ్, బీవీ నాగరత్నతో కూడిన ధర్మాసనం ఇవాళ తెలిపింది.

విద్వేష వ్యాఖ్యల్ని గుర్తించి చర్యలు తీసుకునేందుకు వీలుగా.. ప్రతి రాష్ట్రానికి ఒక నోడల్ అధికారిని నియమించాలని పిటిషనర్లు సిఫార్సు చేయగా.. ప్రతి జిల్లాకు ఒకరిని బెంచ్ సూచించింది. సోషల్ మీడియా నుండి ద్వేషపూరిత ప్రసంగాలను ఉపసంహరించుకోవడానికి ఒక విధానాన్ని రూపొందించాల్సిన అవసరం ఉందని పిటిషనర్లు పేర్కొన్నారు. న్యాయమూర్తులు రాజకీయ రహితులు, పార్టీ A లేదా పార్టీ Bతో సంబంధం కలిగి ఉండరని, వారి మనస్సులో ఉన్న ఏకైక విషయం భారత రాజ్యాంగం అని బెంచ్ పేర్కొంది.

English summary

supreme court on today ask states to file cases against hate speeches in their states even if there is no complaint.