Air Crashes: భారత రాజకీయ చరిత్రలో విమాన ప్రమాదాల విషాద గాథలు

దేశాన్ని నడిపించే నాయకులు... ప్రజల కలల్ని మోసుకెళ్లే ప్రతినిధులు... ఒక సభకు, ఒక పర్యటనకు, ఒక ప్రజా కార్యక్రమానికి బయల్దేరి.. తిరిగి రాలేని ప్రయాణం చేసిన సందర్భాలు ఇవి. ఆకాశం ఎప్పుడూ స్వేచ్ఛకు ప్రతీక.. కానీ కొన్నిసార్లు అదే ఆకాశం... చరిత్రలో కన్నీటి పుటల్ని రాస్తుంది. భారత ప్రజాస్వామ్య చరిత్రలో విమాన ప్రయాణాలు అనేవి కేవలం ఒక ప్రాంతం నుంచి మరో ప్రాంతానికి వెళ్లే సాధనమే కాదు. అవి ప్రజల ఆశలు, అభివృద్ధి కలలు, రాజకీయ బాధ్యతలను మోసుకెళ్లే సాధనాలు. కానీ, కొన్ని సందర్భాల్లో అదే ఆకాశం దేశాన్ని గాయపరిచింది. ప్రముఖ నాయకులు తిరిగి రాని ప్రయాణాలు చేసి, చరిత్రలో విషాద అధ్యాయాలుగా మారిపోయారు. ఈ క్రమంలోనే భారత రాజకీయ చరిత్రలో విమాన ప్రమాదాల విషాద గాథల వివరాలు..

అజిత్ పవార్ (2026)

నేషనలిస్ట్ కాంగ్రెస్ పార్టీ (అజిత్ పవార్ వర్గం) అధినేత, మహారాష్ట్ర ఉప ముఖ్యమంత్రి అజిత్ పవార్ కన్నుమూశారు. ఆయన ప్రయాణిస్తోన్న విమానం ప్రమాదానికి గురైంది. ఈ ఘటనలో ఆయన తుదిశ్వాస విడిచారు. ఆయనతో పాటు విమానంలో ప్రయాణిస్తోన్న మరో ముగ్గురు కూడా మరణించారు. ఆయన ప్రయాణిస్తోన్న విమానం కొద్దిసేపటి కిందటే మహారాష్ట్రలోని బారామతిలో కుప్పకూలింది. క్రాష్ ల్యాండింగ్ కు గురైంది.

విజయ్ రూపాని (2025)

గుజరాత్ మాజీ ముఖ్యమంత్రి, భారతీయ జనతా పార్టీ సీనియర్ నాయకుడు విజయ్ రూపాని 12 జూన్ 2025న జరిగిన విమాన ప్రమాదంలో మరణించారు. ఆహ్మదాబాద్ నుంచి లండన్‌కు బయల్దేరిన ఎయిర్ ఇండియా విమానం టేకాఫ్ అయిన కొద్ది నిమిషాల్లోనే ప్రమాదానికి గురైంది. ఈ దుర్ఘటనలో విమానంలోని ప్రయాణికులు, సిబ్బంది మొత్తం ప్రాణాలు కోల్పోయారు. క్రమశిక్షణ, మృదుస్వభావం కలిగిన నాయకుడిగా పేరున్న రూపాని అకాల మరణం దేశ రాజకీయాల్లో తీవ్ర విషాదాన్ని మిగిల్చింది.అజిత్ పవార్ కన్నుమూత: పొట్టన పెట్టుకున్న విమాన ప్రమాదం

డోర్జీ ఖండు (2011)

ఆరుణాచల్ ప్రదేశ్ ముఖ్యమంత్రిగా ఉన్న డోర్జీ ఖండు 30 ఏప్రిల్ 2011న హెలికాప్టర్ ప్రమాదంలో మరణించారు. పర్వత ప్రాంతాల్లో ప్రయాణిస్తున్న హెలికాప్టర్ కూలిపోవడంతో ఆయనతో పాటు ఇతరులు ప్రాణాలు కోల్పోయారు. గిరిజన ప్రాంతాల అభివృద్ధికి కృషి చేసిన నేతగా గుర్తింపు పొందిన ఖండు మరణం రాష్ట్ర ప్రజలను తీవ్రంగా కలచివేసింది.

వైఎస్. రాజశేఖర రెడ్డి (2009)

ఆంధ్రప్రదేశ్ ముఖ్యమంత్రిగా ప్రజల గుండెల్లో చెరగని ముద్ర వేసిన వైఎస్ రాజశేఖర రెడ్డి.. సెప్టెంబర్ 2, 2009న హెలికాప్టర్ ప్రమాదంలో మరణించారు. నల్లమల అటవీ ప్రాంతంలో ఆయన ప్రయాణిస్తున్న హెలికాప్టర్ కూలిపోవడంతో ఈ విషాదం చోటు చేసుకుంది. రైతులు, పేదల కోసం అమలు చేసిన సంక్షేమ పథకాలతో ఆయన ప్రజానాయకుడిగా నిలిచారు. ఆయన మరణంతో రాష్ట్రం మొత్తం శోకసంద్రంలో మునిగిపోయింది.

జిఎంసి. బాలయోగి (2002)

లోక్‌సభ స్పీకర్‌గా భారత పార్లమెంటరీ చరిత్రలో ప్రత్యేక గుర్తింపు పొందిన జి.ఎం.సి. బాలయోగి.. 3 మార్చి 2002న హెలికాప్టర్ ప్రమాదంలో మరణించారు. సాధారణ నేపథ్యంతో రాజకీయాల్లోకి వచ్చి దేశ అత్యున్నత పదవుల్లో ఒకదాన్ని అధిరోహించిన ఆయన జీవితం అకస్మాత్తుగా ముగిసింది. ఆయన మరణం భారత ప్రజాస్వామ్యానికి తీరని లోటుగా భావించబడింది.

మాధవరావ్ సింధియా (2001)

కాంగ్రెస్ పార్టీ సీనియర్ నాయకుడు, మాజీ కేంద్ర మంత్రి మాధవరావ్ సింధియా.. 30 సెప్టెంబర్ 2001న ప్రైవేట్ విమాన ప్రమాదంలో మరణించారు. ఎన్నికల ర్యాలీకి వెళ్తున్న సమయంలో విమానం కూలిపోవడంతో ఈ దుర్ఘటన జరిగింది. రాజకీయాల్లో మేధావి నేతగా గుర్తింపు పొందిన సింధియా అకాల మరణం దేశ రాజకీయ వర్గాలను దిగ్భ్రాంతికి గురిచేసింది.

ఎన్.వి.ఎన్. సోమూ (1997)

డీఎంకే పార్టీ ఎంపీగా, కేంద్ర రక్షణ శాఖ సహాయ మంత్రిగా పనిచేసిన ఎన్.వి.ఎన్.సోమూ... 14 నవంబర్ 1997న అరుణాచల్ ప్రదేశ్‌లో జరిగిన హెలికాప్టర్ ప్రమాదంలో మరణించారు. ప్రజాసేవలో చురుకుగా ఉన్న సమయంలోనే ఆయన ప్రాణాలు కోల్పోవడం రాజకీయ రంగంలో తీవ్ర విషాదాన్ని మిగిల్చింది.

సురేంద్ర నాథ్ (1994)

పంజాబ్ గవర్నర్‌గా, హిమాచల్ ప్రదేశ్ అదనపు గవర్నర్‌గా బాధ్యతలు నిర్వర్తించిన సురేంద్ర నాథ్ 1994లో జరిగిన విమాన ప్రమాదంలో మరణించారు. పరిపాలనా అనుభవం కలిగిన నాయకుడిగా పేరున్న ఆయన మరణం దేశ పరిపాలనా వర్గాల్లో శోకాన్ని నింపింది.

మోహన్ కుమారమంగళం (1973)

కాంగ్రెస్ పార్టీ నేత, కేంద్ర మంత్రి మోహన్ కుమార మంగళం 1973లో జరిగిన ఇండియన్ ఎయిర్‌లైన్స్ ఫ్లైట్ 440 ప్రమాదంలో ప్రాణాలు కోల్పోయారు. విధానపరమైన నిర్ణయాల్లో స్పష్టత కలిగిన నాయకుడిగా ఆయనకు పేరు ఉంది. ఈ ప్రమాదం దేశ రాజకీయాలకు తీవ్ర నష్టం కలిగించింది.

గుజరాత్ రెండో ముఖ్యమంత్రి, పంచాయతీ రాజ్ వ్యవస్థ రూపకర్తగా పేరొందిన బాల్వంత్రాయ్ గోపాల్జీ మెహ్తా 1965 భారత-పాకిస్తాన్ యుద్ధ సమయంలో మరణించారు. ఆయన ప్రయాణిస్తున్న సివిలియన్ విమానం శత్రుదేశం దాడికి గురై కూలిపోయింది. యుద్ధంలో ప్రత్యక్షంగా ప్రాణాలు కోల్పోయిన అరుదైన ముఖ్యమంత్రిగా ఆయన చరిత్రలో నిలిచిపోయారు.

English summary

Air Crashes: From YS Rajasekhara Reddy to Vijay Rupani, a detailed and emotional account of Indian political leaders who died in tragic air and helicopter crashes, leaving a lasting impact on the nation.