గుర్తింపు కార్డులు చూసి..బస్సు నుంచి కిందికి దించి! యథేచ్ఛగా కాల్పులు

ఇస్లామాబాద్: పాకిస్తాన్ లోని బలూచిస్తాన్ ప్రావిన్స్ మరోసారి రక్తమోడింది. కరాచి-గ్వాదర్ జాతీయ రహదారిపై గుర్తు తెలియని వ్యక్తులు జరిపిన కాల్పుల్లో 14 మంది మరణించారు. ఇద్దరు గాయపడ్డారు. వారిని సమీప ఆసుపత్రికి తరలించారు. గురువారం ఉదయం ఈ ఘటన చోటు చేసుకుంది. బలూచిస్తాన్ లోని ఒర్మారా ప్రాంతంలోని మక్రాన్ కోస్టల్ జాతీయ రహదారిపై సాయుధులైన కొందరు గుర్తు తెలియని వ్యక్తులు ఈ దారుణానికి పాల్పడ్డారు. కరాచీ వైపునకు వెళ్తోన్న ఆరు బస్సులను అటకాయించారు. ప్రయాణికుల వద్ద ఉన్న గుర్తింపు కార్డులను పరిశీలించారు.

ఈ ఆరు బస్సుల నుంచి ఎంపిక చేసిన 16 మంది ప్రయాణికులను కిందికి దించారు. వారిపై విచక్షణారహితంగా కాల్పులు జరిపారు. ఈ ఘటనలో 14 మంది అక్కడిక్కడే మరణించారు. ఇద్దరు గాయపడ్డారు. సుమారు 20 మంది వరకు సాయుధులు తమపై కాల్పులు జరిపి ఉంటారని క్షతగాత్రులు తెలిపారు. ఈ ఘటనకు గల కారణాలు ఇంకా తెలియరాలేదు. తామే ఈ దురాగతానికి పాల్పడినట్లు ఇప్పటిదాకా ఏ ఉగ్రవాద సంస్థ గానీ, అతివాదులు గానీ ప్రకటించుకోలేదు. ఆ ఘటనపై ప్రధానమంత్రి ఇమ్రాన్ ఖాన్ దిగ్భ్రాంతిని వ్యక్తం చేశారు. మృతుల కుటుంబీకులకు సానుభూతి తెలిపారు.

బలూచిస్తాన్ ప్రావిన్స్ లో గుర్తు తెలియని వ్యక్తులు హింసాత్మక ఘటనలకు పాల్పడటం నెలరోజుల్లో ఇది రెండోసారి. ఇదివరకు క్వెట్టా సమీపంలోని ఓ కూరగాయల మార్కెట్ లో షిస్తే సామాజిక వర్గానికి చెందిన ముస్లిం చిరు వ్యాపారులను లక్ష్యంగా చేసుకుని, బాంబు పేలుడు సృష్టించిన విషయం తెలిసిందే. ఈ పేలుడులో 17 మంది మరణించారు. 20 మందికి పైగా గాయపడ్డారు.

English summary

Unidentified gunmen shot dead at least 14 passengers after forcing them to disembark from a bus on a highway in Pakistan's restive Balochistan province, a media report said on Thursday. According to Levies sources, around 15 to 20 unidentified gunmen in camouflage uniform reportedly stopped five or six buses travelling between Karachi and Gwadar. They stopped a bus on the Makran Coastal Highway in Balochistan's Ormara area, checked the identity cards of passengers and offloaded about 16 of them.