ఫ్రాన్స్ నిరసనలపై రగులుతున్న వివాదం.. ట్రంప్ వాదనల్లో పస ఎంత?
ఫ్రాన్స్ పాఠశాలల్లో సిబ్బంది కొరత కారణంగా మొదలైన విద్యార్థుల ఆందోళనలు ప్రస్తుతం పెద్ద ఎత్తున ఉద్రిక్తతకు దారితీశాయి. అయితే ఈ నిరసనలను అమెరికా అధ్యక్షుడు డొనాల్డ్ ట్రంప్ వలసలు, ఇస్లాంతో ముడిపెడుతూ ఫ్రాన్స్‌పై ఇస్లామిక్ టేకోవర్ జరుగుతోందంటూ సెన్సేషనల్ కామెంట్లు చేయడం అంతర్జాతీయంగా చర్చనీయాంశమైంది. అసలు అక్కడ నిజంగా ఏం జరుగుతోంది. ట్రంప్ వాదనల్లో ఎంతవరకు నిజం ఉందనే విషయాలను ఇప్పుడు తెలుసుకుందాం.
ఫ్రాన్స్‌లో ప్రస్తుతం పాఠశాలలు, విశ్వవిద్యాలయాల విద్యార్థులు రోడ్డెక్కి నిరసనలు తెలుపుతున్నారు. తరగతి గదుల్లో విద్యార్థుల సంఖ్య అధికంగా ఉండటం, తగినంత మంది ఉపాధ్యాయులు, నర్సులు, ప్రత్యేక సిబ్బంది లేకపోవడంపై తొలుత ప్యారిస్ సమీపంలోని ఓ హైస్కూల్ విద్యార్థులు ఈ ఆందోళనకు శ్రీకారం చుట్టారు. క్రమంగా ఈ ఉద్యమం దేశంలోని ఇతర ప్రాంతాలకూ పాకింది. మరోవైపు ఫ్రాన్స్ ప్రభుత్వం 2027 నాటి బడ్జెట్లో భారీ కోతలకు ప్లాన్ చేస్తుండటం, ప్రభుత్వ ఉద్యోగుల వేతనాల నిలుపుదల వంటి అంశాలు కూడా ఈ నిరసనలకు మరింత ఆజ్యం పోశాయి.
ఈ ఆందోళనల సమయంలో కొన్ని ప్రాంతాల్లో హింసాత్మక ఘటనలు కూడా చోటుచేసుకున్నాయి. వేలాది మంది విద్యార్థులు, కార్మిక సంఘాల నేతలు రోడ్లపైకి వచ్చారు. ఈ ఘర్షణల్లో వందలాది మంది విద్యార్థులు, సిబ్బంది గాయపడగా.. వేలాది మందిని అరెస్ట్ చేశారు. అయితే ఇది కేవలం కొందరు వామపక్ష కార్యకర్తలు, బాహ్య ఆందోళనకారుల వల్ల జరిగిన హింస మాత్రమేనని, మొత్తం విద్యార్థి ఉద్యమం హింసాత్మకమైనది కాదని స్పష్టం అవుతోంది.
విద్యార్థులు ప్రాథమికంగా విద్యారంగ సమస్యలు, వసతుల కొరతపైనే పోరాడుతున్నప్పటికీ.. అమెరికా అధ్యక్షుడు డొనాల్డ్ ట్రంప్ మాత్రం దీనికి మతపరమైన రంగు పులిమే ప్రయత్నం చేస్తున్నారు. ఫ్రాన్స్‌లో జరుగుతున్న ఈ ఆందోళనల వెనుక పెద్ద ఎత్తున జరుగుతున్న వలసలు, ఇస్లాం ఆధిపత్య ధోరణి ఉందని ఆయన సోషల్ మీడియా వేదికగా పేర్కొన్నారు. అయితే ఫ్రెంచ్ అధికారుల నుంచి వస్తున్న అధికారిక సమాచారం ప్రకారం.. ఇది ఎలాంటి మతపరమైన లేదా ఇస్లామిక్ అజెండా కింద జరుగుతున్న ఆందోళన కాదని తేలింది.
అమెరికా, యూరప్ దేశాల రాజకీయాల నేపథ్యంలోనే డొనాల్డ్ ట్రంప్ ఇలాంటి కామెంట్స్ చేస్తున్నట్లు విశ్లేషకులు భావిస్తున్నారు. యూరప్ లో జరిగే అనేక నిరసనలను వలసలు, భద్రతాంశాలతో ముడిపెట్టి మాట్లాడటం ఆయన శైలి అంటూ పేర్కొంటున్నారు. మరోవైపు సోషల్ మీడియాలో కొన్ని పాత సంబంధం లేని వీడియోలను ప్రస్తుత నిరసనలకు ఆపాదిస్తూ కొందరు తప్పుడు ప్రచారం చేస్తుండటం గమనార్హం. ఏదేమైనా ప్రాథమికంగా స్కూళ్ల సమస్యలతో ప్రారంభమైన ఈ ఆందోళనలు ప్రస్తుతం రాజకీయ, అంతర్జాతీయ చర్చకు కేంద్రబిందువుగా మారాయి.
Click it and Unblock the Notifications
Sign in with Google
