బీరూట్ను నేలమట్టం చేస్తాం: ఇజ్రాయెల్ సీరియస్ వార్నింగ్!
మధ్యప్రాచ్యంలో ఇజ్రాయెల్, ఇరాన్, హిజ్బుల్లా మధ్య ఉద్రిక్తతలు పతాక స్థాయికి చేరాయి. గత రెండ్రోజులుగా ఇరు దేశాలు ఒకరిపై ఒకరు క్షిపణులతో దాడులు చేసుకుంటున్న తరుణంలో హిజ్బుల్లా కూడా రంగంలోకి దిగింది. హిజ్బుల్లా జరిపిన తాజా ఎదురుదాడిపై ఇజ్రాయెల్ తీవ్ర ఆగ్రహం వ్యక్తం చేసింది. తమపై ఎలాంటి దాడి జరిగినా సహించేది లేదని, శత్రువులను అస్సలు వదిలిపెట్టబోమని స్పష్టం చేస్తూ ఇజ్రాయెల్ కఠినమైన వైఖరిని అవలంభించింది.
హిజ్బుల్లా ఎదురుదాడికి దిగిన నేపథ్యంలో ఇజ్రాయెల్ రక్షణ మంత్రి ఇజ్రాయెల్ కాట్జ్ శత్రువులకు వార్నింగ్ ఇచ్చారు. ఒకవేళ హిజ్బుల్లా గనుక ఉత్తర ఇజ్రాయెల్పై దాడులు చేయాలని చూస్తే లెబనాన్ రాజధాని బీరూట్లోని వారి ప్రధాన స్థావరాలను గురిపెట్టి మరీ నేలమట్టం చేస్తామని హెచ్చరించారు. ఇరాన్-ఇజ్రాయెల్ మధ్య ఘర్షణలు తీవ్రరూపం దాల్చిన తర్వాత ఇజ్రాయెల్ రక్షణ మంత్రి నుంచి వచ్చిన మొదటి అధికారిక స్పందన ఇదే కావడం గమనార్హం. లెబనాన్లోని హిజ్బుల్లా ఉగ్రవాదులకు వ్యతిరేకంగా ఇజ్రాయెల్ డిఫెన్స్ ఫోర్సెస్(ఐడీఎఫ్) తన సైనిక చర్యలను కొనసాగిస్తుందని.. దేశ రక్షణ విషయంలో ఎలాంటి రాజీ పడే ప్రసక్తే లేదని కాట్జ్ స్పష్టం చేశారు.
మరోవైపు ఇజ్రాయెల్ ప్రధాని బెంజమిన్ నెతన్యాహు మాట్లాడుతూ.. ప్రస్తుతానికి ఇరాన్పై తాము దాడులను నిలిపివేసినట్లు ప్రకటించారు. అయితే ఇరు దేశాల మధ్య అధికారికంగా కాల్పుల విరమణ జరిగిందనే విషయాన్ని ఆయన ధ్రువీకరించలేదు. ఇరాన్ వైపు నుంచి ఇజ్రాయెల్ భూభాగాలపై దాడులు ఆగిపోయినందున.. ప్రస్తుతం తాము కూడా పోరాటాన్ని ఆపామని నెతన్యాహు వెల్లడించారు. ఒకవేళ ఇరాన్ మళ్లీ గనుక దాడులకు తెగబడితే.. అంతకంటే బలమైన సమాధానం ఇస్తామని హెచ్చరించారు.
ఇజ్రాయెల్ జరుపుతున్న సైనిక దాడులకు నిరసనగానే తాము ఈ క్షిపణి దాడులు చేసినట్లు ఇరాన్ వెల్లడించింది. ఇజ్రాయెల్కు తాము గట్టి బుద్ధి చెప్పామని ఇరాన్ సైన్యం ప్రకటించింది. అంతేకాకుండా, ఇజ్రాయెల్ గనుక దక్షిణ లెబనాన్లో హిజ్బుల్లా స్థావరాలపై దాడులను ఇలాగే కొనసాగిస్తే, తాము మునుపటి కంటే చాలా తీవ్రమైన, ఊహించని రీతిలో భారీ ఎదురుదాడికి దిగుతామని ఇరాన్ హెచ్చరించింది. ఉద్రిక్తతల మధ్య ఇరాన్ అధ్యక్షుడు మసూద్ పెజెష్కియాన్ స్పందిస్తూ, తమ దేశ సార్వభౌమత్వాన్ని, జాతీయ ప్రయోజనాలను కాపాడుకోవడానికి ఇరాన్ పూర్తి సన్నద్ధతతో ఉందని పేర్కొన్నారు. అదే సమయంలో చర్చలు, దౌత్యపరమైన మార్గాల ద్వారా సమస్యను పరిష్కరించుకోవడానికి కూడా తాము సిద్ధంగా ఉన్నట్లు తెలిపారు. ఇరాన్ ఎవరి ఒత్తిళ్లకు తలొగ్గబోదని, అలాగని చర్చల మార్గాన్ని వదులుకోదని ఆయన స్పష్టం చేశారు. బలమైన రక్షణ వ్యవస్థ, దౌత్యం రెండూ దేశ ప్రయోజనాలకు ముఖ్యమని, అవి రెండూ కలిసే సాగుతాయని అన్నారు.
ఇదే తరుణంలో అమెరికా అధ్యక్షుడు డొనాల్డ్ ట్రంప్ రంగంలోకి దిగి ఓ కీలక ప్రకటన చేశారు. ఇరాన్, ఇజ్రాయెల్ దేశాలు తక్షణమే కాల్పుల విరమణ ప్రకటించే దిశగా ఆలోచిస్తున్నాయని ఆయన పేర్కొన్నారు. ఇరు దేశాల మధ్య శాంతి ఒప్పందానికి సంబంధించి చివరి రౌండ్ చర్చలు జరుగుతున్నాయని ట్రంప్ వెల్లడించారు. అయితే ఈ సమయంలో జరిగే ఎలాంటి చిన్న పొరపాటైనా శాంతి ప్రక్రియను దెబ్బతీసే ప్రమాదం ఉందని ఆయన హెచ్చరించారు. ఇరు పక్షాల మధ్య తుది ఒప్పందం కుదిరే వరకు ఇరాన్పై అమెరికా విధించిన ఆంక్షలు ఇలాగే కొనసాగుతాయని ట్రంప్ స్పష్టం చేశారు.
Click it and Unblock the Notifications
Sign in with Google