ఒకేవ్యక్తికి ఏకకాలంలో మంకీపాక్స్, హెచ్ఐవీ పాజిటివ్ మరియు కరోనా పాజిటివ్; ప్రపంచంలోనే తొలికేసు!!
ప్రపంచవ్యాప్తంగా విజృంభిస్తున్న వివిధ రకాల వైరస్లు ఆందోళన కలిగిస్తున్నాయి. కరోనా మహమ్మారి విజృంభన తరువాత ఎప్పుడు ఏ కొత్తరకం వైరస్ దాడి చేస్తుందో అన్న ఆందోళన ఇంకా ప్రజల మనసులను వీడడం లేదు. ఇక తాజాగా వెలుగులోకి వచ్చిన ఒక కొత్త కేసు ప్రపంచంలోనే మొట్టమొదటి కేసుగా పరిగణిస్తున్న పరిస్థితి ఉంది. ఇక కేసు వివరాల్లోకి వెళితే ఇటలీకి సంబంధించిన 36 సంవత్సరాల వ్యక్తికి ఏకకాలంలో మంకీ పాక్స్, కోవిడ్-19 మరియు హెచ్ఐవికి పాజిటివ్ నిర్ధారణ అయినట్టుగా వెల్లడైంది.
వివిధ రోగ లక్షణాలతో ఆస్పత్రిలో అత్యవసర విభాగంలో చేరిన రోగి
జర్నల్ ఆఫ్ ఇన్ఫెక్షన్లో ప్రచురించబడిన ఒక నివేదిక ప్రకారం, స్పెయిన్ కు చెందిన రోగి తన ఐదు రోజుల పర్యటన నుండి తిరిగి వచ్చిన తొమ్మిది రోజుల తర్వాత జ్వరం, గొంతు నొప్పి, అలసట, తలనొప్పి మరియు మర్మాంగాల వద్ద తీవ్రమైన ఇన్ఫెక్షన్ తో ఇబ్బంది పడ్డాడు. ఈ లక్షణాలు కనిపించిన మూడు రోజుల తర్వాత ఆ వ్యక్తికి కరోనా పాజిటివ్ అని నిర్ధారణ అయింది. ఆ తర్వాత అతని ముఖం పై, ఇతర శరీర భాగాలపై తీవ్రమైన దద్దుర్లు కూడా అభివృద్ధి చెందాయి. అతని శరీరం అలర్జీకి గురికావడంతో వెంటనే సదరు వ్యక్తి ఆస్పత్రిలో అత్యవసర విభాగంలో అడ్మిట్ అయ్యాడు.
మంకీపాక్స్, హెచ్ఐవీ పాజిటివ్ మరియు కరోనా లక్షణాలు ఉన్నట్టు గుర్తించిన వైద్యులు
మనిషి యొక్క శారీరక పరీక్షలో అనేక చోట స్కిన్ ఎలర్జీ బయటపడింది. ఇక ఇదే సమయంలో అతని లివర్ కూడా వాపు వచ్చిందని, శరీరం లోపల ఇతర అవయవాలు కూడా బాగా ఎఫెక్ట్ అయినట్టుగా వైద్యులు గుర్తించారు. ఇక వెంటనే అతని రక్తపు నమూనాలను రిపోర్టుల కోసం పంపించిన వైద్యులు రిపోర్ట్ ను చూసి ఒక్కసారిగా షాక్ తిన్నారు. అతని టెస్ట్ రిపోర్టులో మంకీపాక్స్ ఇన్ఫెక్షన్ ఉన్నట్లు నిర్ధారించారు. అతనికి కూడా హెచ్ఐవీ పాజిటివ్ అని తేలింది. అంతేకాకుండా, అతనికి ఓమిక్రాన్ సబ్-వేరియంట్ బీఏ.5.1 సోకినట్లు నిర్ధారించింది. ఆ వ్యక్తికి ఫైజర్స్ ఎంఆర్ఎన్ఏ వ్యాక్సిన్ రెండు డోస్లతో కరోనావైరస్ కోసం టీకాలు కూడా ఇచ్చారని నివేదిక పేర్కొంది .
ఈ కేసుతో ఎన్నో కొత్త విషయాలు వెలుగులోకి
అతని కేసు ఆగస్ట్ 19న జర్నల్ ఆఫ్ ఇన్ఫెక్షన్లో ప్రచురించబడింది. దాదాపు ఒక వారం తర్వాత ఆ వ్యక్తి ఆసుపత్రి నుండి డిశ్చార్జ్ అయ్యాడు. అతను కోవిడ్ -19 మరియు మంకీపాక్స్ నుండి కోలుకున్నాడు. అతని హెచ్ఐవి సంక్రమణకు చికిత్స ప్రారంభించబడింది. ఇక ఈ కేసు మంకీపాక్స్ మరియు కోవిడ్-19 లక్షణాలు ఎలా అతివ్యాప్తి చెందుతాయో హైలైట్ చేస్తుంది. ఇది లైంగిక అలవాట్లు సరైన రోగ నిర్ధారణ చేయడానికి ఎలా కీలకమో ధృవీకరిస్తుంది అని పరిశోధకులు తమ కేసుపై ఇచ్చిన నివేదికలో తెలిపారు.
ప్రపంచంలోనే మంకీపాక్స్, హెచ్ఐవీ పాజిటివ్, కరోనా ఏకకాలంలో వచ్చిన తొలికేసు
గమనించదగ్గ విషయం ఏమిటంటే, 20 రోజుల తర్వాత కూడా మంకీపాక్స్ కు అతని నమూనాలు సానుకూలంగా ఉన్నాయి. దీంతోఈ వ్యక్తులు క్లినికల్ రిమిషన్ తర్వాత చాలా రోజుల వరకు అంటువ్యాధిని కలిగి ఉండవచ్చని సూచిస్తున్నారు. పర్యవసానంగా, వైద్యులు తగిన జాగ్రత్తలను ప్రోత్సహించినట్టు తెలుస్తుంది. మంకీపాక్స్ వైరస్, కోవిడ్-19 మరియు హెచ్ఐవి కో-ఇన్ఫెక్షన్కి సంబంధించిన ఏకైక కేసు ఇదేనని పరిశోధకులు పేర్కొన్నారు. ఈ కలయిక రోగి పరిస్థితిని మరింత తీవ్రతరం చేస్తుందనడానికి ఇంకా తగిన ఆధారాలు లేవని తెలిపారు.
Click it and Unblock the Notifications
Sign in with Google