జపాన్‌లో అలర్ట్: మూడు రోజుల్లో మూడు భూకంపాలు!

జపాన్‌లో వరుస భూకంపాలు ఆందోళన కలిగిస్తున్నాయి. డిసెంబర్ 8న భారీ 7.5 తీవ్రత భూకంపం సంభవించిన తర్వాత, మంగళవారం 6.7 తీవ్రత ప్రకంపనలు వచ్చాయి. బుధవారం (డిసెంబర్ 10) హోన్షు తూర్పు తీరంలో 5.7 తీవ్రతతో మరో భూకంపం సంభవించింది. ఈ భూకంపానికి సంబంధించినతక్షణ నష్టం నివేదికలు లేవు. యూరోపియన్ మెడిటరేనియన్ సీస్మోలాజికల్ సెంటర్ (EMSC) ప్రకారం, ఈ 5.7 తీవ్రత భూకంపం హోన్షు తీరానికి దూరంగా 31 కిలోమీటర్ల లోతులో సంభవించింది. తొలుత EMSC దీనిని 6.5 తీవ్రతగా, 57 కిలోమీటర్ల లోతుగా పేర్కొన్నా, తర్వాత అది 5.7 గా నిర్ధారితమైంది.

డిసెంబర్ 8న రాత్రి సుమారు 11:15 గంటలకు వచ్చిన ప్రధాన భూకంపం, పసిఫిక్ మహాసముద్రంలో, జపాన్ ప్రధాన ద్వీపమైన హోన్షులోని ఆమోరి తీరానికి 80 కిలోమీటర్ల (50 మైళ్లు) దూరంలో సంభవించింది. US జియోలాజికల్ సర్వే (USGS) దీని తీవ్రతను 7.6గా, లోతును 44 కిలోమీటర్లు (27 మైళ్లు) గా అంచనా వేయగా, జపాన్ అధికారులు 7.5 తీవ్రతగా గుర్తించారు.

ఈ శక్తివంతమైన భూకంపం పసిఫిక్ తీరప్రాంతాల్లో గాయాలకు, స్వల్ప నష్టానికి, సునామీకి దారితీసింది. ఫైర్ అండ్ డిజాస్టర్ మేనేజ్‌మెంట్ ఏజెన్సీ (FDMA) వివరాల ప్రకారం, దాదాపు 34 మంది గాయపడ్డారు, వారిలో ఒకరి పరిస్థితి విషమంగా ఉంది. ఎక్కువగా పడిపోయిన వస్తువుల వల్ల గాయాలయ్యాయని పబ్లిక్ బ్రాడ్‌కాస్టర్ NHK తెలిపింది. అధికారులు సునామీ హెచ్చరికలు జారీ చేసి, రైలు సర్వీసులను నిలిపివేశారు.

జపాన్ మెటియోరోలాజికల్ ఏజెన్సీ (JMA) నివేదించిన దాని ప్రకారం, భూకంపం తర్వాత ఆమోరికి దక్షిణాన గల ఇవాటే ప్రిఫెక్చర్‌లోని కుజి పోర్టులో 70 సెంటీమీటర్ల (2 అడుగుల, 4 అంగుళాలు) ఎత్తు సునామీ తరంగాలు నమోదయ్యాయి. ఈ ప్రాంతంలోని ఇతర తీరప్రాంతాల్లోనూ 50 సెంటీమీటర్ల లోపు సునామీ స్థాయిలు కనిపించాయి. ప్రధాని సనే తకాచీ పరిస్థితిని అంచనా వేయడానికి అత్యవసర కార్యాచరణ బృందాన్ని ఏర్పాటు చేశారు. 'మేము ప్రజల ప్రాణాలకు ప్రాధాన్యత ఇస్తున్నాం, చేయగలిగినదంతా చేస్తున్నాం' అని ఆమె విలేకరులతో అన్నారు.

English summary

A series of significant earthquakes near Honshu, Japan, following a major event on December 8, prompted tsunami advisories and disrupted transport. Injuries were reported, and authorities prepared emergency responses while monitoring aftershocks and coastal impacts.