Gold News: టన్నుల్లో బయటపడ్డ గోల్డ్ రిజర్వ్స్.. చైనా పసిడి విలువ ఎంతంటే..

China Gold Deposits: ప్రపంచ వ్యాప్తంగా ఉన్న బంగారం నిల్వల కంటే దానికి ఉన్న గిరాకీ ఎక్కువ. అందుకే నిరంతరం గోల్డ్ రేట్లు పెరుగుతూనే ఉన్నాయి. ఈ క్రమంలో ఇటీవలి కాలంలో కొత్త గోల్డ్ రిజర్వ్స్ బయటపడటం వార్తల్లో వినిపిస్తోంది. గతంలో అరబ్ దేశంలో బయటపడ్డ గోల్డ్ నిల్వల తర్వాత ప్రస్తుతం చైనాలో భారీగా నిల్వలు ఉన్నట్లు వెల్లడైంది.

చైనాలోని సెంట్రల్ హునాన్ ప్రావిన్స్‌లో ప్రపంచంలోనే అతిపెద్ద బంగారు నిక్షేపం కనుగొనబడింది. ఇక్కడ ఏకంగా 1,000 టన్నుల పసిడి నిల్వలు ఉండవచ్చని భూగర్భ శాస్త్రవేత్తలు అంచనా వేశారు. ప్రస్తుత మార్కెట్ విలువ ప్రకారం ఈ 'సూపర్‌జెయింట్ గోల్డ్ డిపాజిట్' విలువ 80 బిలియన్ డాలర్ల కంటే ఎక్కువగా ఉండవచ్చని నిపుణులు చెబుతున్నారు. అది భూమిపై కనుగొనబడిన అత్యంత విలువైన వనరుగా మారింది. జియోలాజికల్ బ్యూరో ఆఫ్ హునాన్ ప్రావిన్స్ శాస్త్రవేత్తలు పింగ్జియాంగ్ కౌంటీలోని వాంగు బంగారు క్షేత్రం క్రింద 40 కంటే ఎక్కువ వెయిన్స్ కనుగొన్నారు. చైనా మీడియా ప్రకారం నిక్షేపాల విలువ 600 బిలియన్ యువాన్లుగా అంచనా వేయబడింది. భారత కరెన్సీ విలువ ప్రకారం ఇది సుమారు రూ.7 లక్షల కోట్లకు సమానం.

ప్రస్తుతం చైనాలో గుర్తించిన గోల్డ్ రిజర్వు.. దక్షిణాఫ్రికాలోని సౌత్ డీప్ మైన్‌లో లభించిన 930 మెట్రిక్ టన్నులను అధిగమించి ప్రపంచంలోనే అతిపెద్ద బంగారు నిల్వగా మారనుంది. ఇది చైనా బంగారు పరిశ్రమకు గణనీయమైన ప్రభావాలను కలిగి ఉంది.

ప్రపంచంలోని అతిపెద్ద బంగారు నిక్షేపాలను పరిశీలిస్తే..

- చైనా, పింగ్జియాంగ్ కౌంటీ: 1,000 టన్నులు

- సౌత్ డీప్, సౌత్ ఆఫ్రికా: 929 టన్నులు

- గ్రాస్‌బర్గ్, ఇండోనేషియా: 856 టన్నులు

- ఒలింపియాడా, రష్యా: 737 టన్నులు

- లిహిర్, పాపువా న్యూ గినియా: 680 టన్నులు

- నోర్టే అబిర్టో, చిలీ: 657 టన్నులు

- కార్లిన్ ట్రెండ్, నెవాడా 353 టన్నులు

- బోడింగ్టన్, ఆస్ట్రేలియా: 350 టన్నులు

- ఎంపాంగెంగ్, దక్షిణాఫ్రికా: 330 టన్నులు

- ప్యూబ్లో వీజో, డొమినికన్ రిపబ్లిక్: 309 టన్నులు

- కోర్టెజ్, నెవాడా: 246 టన్నులు

ప్రతి టన్ను ధాతువులో 138 గ్రాముల స్వచ్ఛమైన బంగారం ఉంటుందని సైట్‌లో తీసిన రాళ్ల నమూనాలు చైనాలో వెల్లడించాయి. వాంగూ గోల్డ్ ఫీల్డ్‌లో 3డి జియోలాజికల్ మోడలింగ్ వంటి కొత్త ధాతువు ప్రాస్పెక్టింగ్ టెక్నాలజీలను ఉపయోగించారు. సైట్ చుట్టుపక్కల ప్రాంతాల్లో కూడా డ్లింగ్ చేస్తున్న సమయంలో పసిడి గుర్తించబడింది. చైనీస్ అధికారులు ఇంకా సైట్‌ను అభివృద్ధి చేయడానికి ప్రణాళికలను ప్రకటించలేదు. అయితే గుర్తించబడిన బంగారు నిక్షేపం త్వరలో చైనాలోనే అతిపెద్ద మైనింగ్ ప్రాజెక్టులలో ఒకటిగా మారే అవకాశం ఉందని తెలుస్తోంది. అక్కడి మీడియా సైతం దీనిపై విస్తృత కథనాలు ప్రసారం చేస్తోంది.

English summary

The world's largest gold deposit has been discovered in China's central Hunan province - and geologists believe it could hold 1,000 tonnes of the precious metal.