పాక్‌ జైలులో తెలుగు ఖైదీ: వివరాలిస్తే విడుదల

హైదరాబాద్: పాకిస్థాన్‌లోని లాహోర్ కేంద్ర కారాగారంలో బందీగా ఉన్న ఖైదీలలో ఓ తెలుగు యువకుడు ఉన్నట్లు పాకిస్థాన్ నుంచి భారత్‌కు సమచారం వచ్చింది. సరైన వివరాలు లేకపోవడంతో అతని విడుదల ఆగిపోయిందని తెలిపింది. భారత్, పాకిస్థాన్ దేశాల మధ్య ద్వైపాక్షిక చర్చల్లో భాగంగా పరస్పరం ఖైదీల అప్పగింతకు ఇటీవలే ఒప్పందం కుదిరిన విషయం తెలిసిందే.

భారత్‌కు చెందిన తెలుగు ఖైదీ విడుదలకు పాకిస్థాన్ అధికారులు సిద్ధమయ్యారు. అయితే అతడికి సంబంధించిన పూర్తి వివరాలేవీ లేకపోవడంతో అక్కడి అధికారులు భారత ప్రభుత్వానికి లేఖ రాశారు. ఈ నేపథ్యంలో ఖైదీకి సంబంధించిన పూర్తి వివరాలు సేకరించాలని తెలంగాణ, ఆంధ్రప్రదేశ్ రాష్ట్రాలను కేంద్రం కోరింది.

సైబరాబాద్ స్పెషల్ బ్రాంచ్ ఏసిపి రవీందర్ రెడ్డి బుధవారం ఓ పత్రిక ప్రకటన విడుదల చేశారు. ఖైదీ పేరు రమేష్ అని, అతనికి 20ఏళ్ల వయస్సు ఉంటుందని, ఎత్తు 5 అడుగుల 7 అంగుళాలని, కుడి చెంపపై పెద్ద పుట్టుమచ్చ ఉందని పేర్కొన్నారు.

ఈ వివరాలతో పోలికలున్న వ్యక్తి కుటుంబం తమని సంప్రదిస్తే పాస్‌పోర్ట్ సిద్ధం చేసి పాకిస్థాన్‌కు పంపిస్తామని ఆయన తెలిపారు. అతనికి సంబంధించిన పూర్తి వివరాలు అందజేస్తే ఖైదీగా ఉన్న రమేష్‌ను పాకిస్తాన్ విడుదల చేస్తారు.

English summary

It said that a Telugu youth held in Pakistan jail.