డ్రీమర్లకు షాక్! కీలక బిల్లులు తిరస్కరించిన సెనేట్, హెచ్1బీ ఆశావహులకు నిరాశే..
వాషింగ్టన్: బాల్యంలోనే తల్లిదండ్రులతో అమెరికాకు అక్రమంగా వలసవచ్చిన 18 లక్షల మంది(డ్రీమర్ల)కు అమెరికా ఎగువసభ సెనేట్ షాకిచ్చింది. వారికి పౌరసత్వం కల్పించేందుకు అధ్యక్షుడు ట్రంప్ తీసుకొచ్చిన బిల్లును శుక్రవారం 60-39 ఓట్ల తేడాతో తిరస్కరించింది.
ఈ నేపథ్యంలో డ్రీమర్ల భవితవ్యంపై అమెరికాలో మళ్లీ నీలినీడలు కమ్ముకున్నాయి. నిజానికి ఈ బిల్లు గనుక ఆమోదం పొందినట్లయితే అటు డ్రీమర్లకు మేలు జరగడంతోపాటు ఇటు హెచ్1బీ వీసా కోసం ఎదురుచూస్తోన్న ఎంతోమంది భారతీయులకూ లబ్ధి కలిగి ఉండేది.
గందరగోళంలో డ్రీమర్ల భవిష్యత్తు...
మళ్లీ అమెరికాలోని డ్రీమర్ల భవిష్యత్తు గందరగోళంలో పడింది. వారికి పౌరసత్వం కల్పించే బిల్లు సెనేట్లో ఓడిపోయిన నేపథ్యంలో దాదాపు 18 లక్షల మంది స్వాప్నికుల పరిస్థితి అగమ్యగోచరంగా మారింది. వీరికి దశలవారీగా అమెరికా పౌరసత్వం ఇచ్చేందుకు గతంలో బరాక్ ఒబామా ప్రభుత్వం డెఫర్డ్ యాక్షన్ ఫర్ చైల్డ్హుడ్ అరైవల్స్ (డాకా) పథకాన్ని తెచ్చింది. అయితే ప్రస్తుత అధ్యక్షుడు డొనాల్డ్ ట్రంప్ గత సెప్టెంబర్లో ఈ పథకాన్ని ఎత్తివేశారు. దీంతో ఆరు నెలల్లోగా వారి సమస్యకు పరిష్కారం చూపాలని ప్రజాప్రతినిధుల సభ కాంగ్రెస్ సూచించింది. లేకుంటే మార్చి 5వ తేదీ నుంచి డ్రీమర్స్ అందరూ దేశబహిష్కరణకు గురవుతారు.
60-39 ఓట్ల తేడాతో తిరస్కరణ...
డ్రీమర్లకు పౌరసత్వం కల్పించే అంశంపై ఇటు డొనాల్డ్ ట్రంప్ ప్రభుత్వం అటు డెమెక్రాట్లు పలు దఫాలు చర్చలు జరిపారు. చివరికి అమెరికాలోని 18 లక్షల మంది డ్రీమర్లకు పౌరసత్వం ఇచ్చేందుకు ట్రంప్ ప్రభుత్వం ఒప్పుకుంది. ఇందుకు ప్రతిగా 2.5 వేల కోట్ల డాలర్ల ఖర్చుతో అమెరికా, మెక్సికో మధ్య గోడ నిర్మాణానికి ప్రతిపక్షం కూడా ఒప్పుకుంది. ఇలా పరస్పర ఒప్పందంతో బిల్లును రూపొందించి ఎగువ సభ సెనేట్లో ప్రవేశపెట్టినా చివరికి ఈ బిల్లు 60-39 ఓట్ల తేడాతో తిరస్కరణకు గురైంది.
నిరాశలో ప్రవాస భారతీయులు....
డ్రీమర్ల సంక్షేమం కోసం ట్రంప్ ప్రభుత్వం ప్రవేశపెట్టిన ఈ బిల్లు గనుక ఆమోదం పొందినట్లయితే అమెరికాలోకి కుటుంబ ఆధారిత వలసలతోపాటు దేశాల వారీగా చేపట్టే లాటరీ వీసా పద్ధతి కూడా రద్దయ్యేది. ఫలితంగా హెచ్1బీ వీసా కోసం ఎదురుచూస్తున్న ఎంతోమంది భారతీయులకు లబ్ధి చేకూరి ఉండేది. కానీ ఇప్పుడీ బిల్లు వీగిపోవడం.. అందరి ఆశలపై నీళ్లు చల్లినట్లయింది.
మార్చి 5 తరువాత ఏం జరుగుతుంది?
అమెరికాలో వలసలపై సెనెటర్లు షుమర్-రౌండ్స్-కొలిన్స్ ప్రతిపాదించిన మరో బిల్లును సైతం ఎగువ సభ 54-45 ఓట్ల తేడాతో తిరస్కరించింది. నిజానికి అమెరికా సెనెట్లో ఏదైనా బిల్లు ఆమోదం పొందాలంటే 60 ఓట్లు రావడం తప్పనిసరి. వీసా జారీలో లాటరీ విధానం రద్దు సహా దేశాల వారీగా గ్రీన్కార్డుల సంఖ్య పరిధి ఎత్తివేతకు సంబంధించిన బిల్లులను ఇప్పుడు అమెరికా ఎగువసభ తిరస్కరించింది. ఈ నేపథ్యంలో త్వరలో మరో ఒప్పందం కుదరకుంటే మార్చి 5 తర్వాత 18 లక్షల మంది డ్రీమర్లను బలవంతంగా విదేశాలకు పంపిస్తారేమోనన్న భయాలు నెలకొన్నాయి.
Click it and Unblock the Notifications
Sign in with Google