అప్పుడే పుట్టిన శిశువుకు దంతాలు... ఆశ్చర్యపోయిన తల్లిదండ్రులు...

అప్పుడే పుట్టిన ఓ పసిపాపకు పుట్టుకతోనే రెండు దంతాలు ఉండటం చూసి తల్లిదండ్రులు ఆశ్చర్యపోయారు. ఓ ప్రైవేట్ ఆస్పత్రిలో గురువారం(జూలై 9) ఓ మహిళ శిశువుకు జన్మనివ్వగా.. వైద్యులు ఆ పసి పాప నోట్లో దంతాలను గుర్తించారు. జోగులాంబ గద్వాల జిల్లాలో ఈ ఘటన చోటు చేసుకుంది.

డెలివరీ కష్టం కావడంతో ఆపరేషన్ చేశామని... ప్రస్తుతం తల్లీబిడ్డ క్షేమంగా ఉన్నారని వైద్యులు తెలిపారు. సాధారణంగా బిడ్డ పుట్టిన ఆరు నుంచి 12 నెలల్లో దంతాలు వస్తాయి. కానీ కొంతమంది శిశువుల్లో ఇలా పుట్టుకతోనే పళ్లు వస్తాయి. వీటిని నాటల్ పళ్లు అంటారు. వైద్య నిపుణుల అంచనా ప్రకారం ప్రతీ 2వేల మందిలో ఒకరికి మాత్రమే ఇలా పుట్టుకతో పళ్లు వస్తాయి. దీనికి పెద్దగా కంగారు పడాల్సిన పనేమీ లేదని వైద్యులు చెబుతుంటారు.

ఒక అంచనా ప్రకారం ఇలా పుట్టుకతోనే దంతాలతో పుట్టే శిశువుల కుటుంబాల్లో అంతకుముందు అలా పుట్టినవారు ఉంటారు. పుట్టుకతోనే దంతాలతో పుట్టే 15శాతం శిశువులు ఇలాంటి నేపథ్యం కలిగి ఉండవచ్చు. ఇందులో మగ శిశువుల కంటే ఆడ శిశువులే ఎక్కువగా ఉంటారు. నాటల్ పళ్లు మొదట్లో కాస్త కదిలినట్లుగా అనిపించినా... ఆ తర్వాత వాటి నిర్మాణం గట్టిపడుతుంది. అప్పుడప్పుడు వైద్యుడి వద్దకు వెళ్లి చెకప్ చేయించుకుంటే మంచిది.

English summary

A baby born with two teeths in a private hospital in Jogulamba Gadwal district,on Thursday. Doctors said they surprised after seen teeths in babies mouth,but said it is normal to born with teeth.