కేసీఆర్‌కు ఝలక్: 'గెటవుట్'.. ఉస్మానియా వర్సిటీలో కేకేకు చేదు అనుభవం

ఉస్మానియా విశ్వవిద్యాలయంలో తెరాస నేత, ఎంపీ కే కేశవ రావు (కేకే)కు మంగళవారం చేదు అనుభవం ఎదురయింది.

హైదరాబాద్: ఉస్మానియా విశ్వవిద్యాలయంలో తెరాస నేత, ఎంపీ కే కేశవ రావు (కేకే)కు మంగళవారం చేదు అనుభవం ఎదురయింది. పూర్వ విద్యార్థుల సమ్మేళనంలో పాల్గొనేందుకు వచ్చిన ఆయనను ఓయు విద్యార్థులు 'గెటవుట్' అంటూ నినాదాలు చేశారు. దీంతో అక్కడ ఉద్రిక్త పరిస్థితి తలెత్తింది.

తెలంగాణ వస్తే ఉద్యోగాలు వస్తాయని చెప్పారని, కానీ ఇప్పటి వరకు నోటిఫికేషన్లు లేవని ఓయు విద్యార్థులు మండిపడ్డారు. విద్యార్థుల జీవితాలతో ఆటలు ఆడుకుంటున్నారని మండిపడ్డారు.

కేశవ రావు గో బ్యాక్, గెటవుట్ అంటూ నినాదాలు చేశారు. ఓ సమయంలో కేకే గన్‌మెన్లు, విద్యార్థులకు మధ్య వాగ్వాదం చోటు చేసుకుంది. పరిస్థితి చేయి దాటకముందే పోలీసులు జోక్యం చేసుకున్నారు.

తెలంగాణ ఉద్యమంలో ఓయు ముఖ్యపాత్ర పోషించింది. ఇప్పుడు అదే ఓయులో ప్రభుత్వానికి వ్యతిరేకంగా విద్యార్థులు నిరసన వ్యక్తం చేయడం గమనార్హం. గతంలోను విద్యార్థులు తెరాస ప్రభుత్వంపై మండిపడిన రోజులు ఉన్నాయి.

English summary

Bitter experience to TRS leader and MP K Keshav Rao in Osmania University on Tuesday.