కాచిగూడ- బెంగళూరు వందే భారత్ ప్రయాణికులకు గుడ్ న్యూస్

Vande Bharat Express: దేశంలో వందే భారత్ ఎక్స్‌ప్రెస్ రైళ్ల దూకుడు కొనసాగుతోంది. సంఖ్య రోజురోజుకూ పెరుగుతోంది. పూర్తి స్వదేశీ పరిజ్ఞానంతో తయారైన ఈ సెమీ హైస్పీడ్ రైళ్ల సర్వీసులను కేంద్ర ప్రభుత్వం ప్రయాణికులకు మరింత చేరువ చేస్తోంది. దేశవ్యాప్తంగా ఇప్పటివరకు పలు రైళ్లు పట్టాలెక్కాయి. వేర్వేరు రాష్ట్రాలు/నగరాల మధ్య పరుగులు పెడుతున్నాయి.

సాధారణ రైళ్లల్లో ఇప్పటివరకు లేని కొన్ని ప్రత్యేకతలు, వేగం.. వందే భారత్ ఎక్స్‌ప్రెస్‌లో ఉండటం వల్ల వాటికి డిమాండ్ పెరుగుతోంది. ఆక్యుపెన్సీ రేషియో భారీగా ఉంటోంది. సాధారణ రైళ్లతో పోల్చుకుంటే టికెట్ ధర అధికమే అయినప్పటికీ- త్వరితగతిన గమ్యస్థానాలకు చేరడానికి వందే భారత్‌ను ఆశ్రయిస్తోన్నారు ప్రయాణికులు.

ప్రయాణికుల నుంచి లభిస్తోన్న అపూర్వ ఆదరణను దృష్టిలో ఉంచుకుని కేంద్ర ప్రభుత్వం వందే భారత్‌లో కీలక మార్పులను తీసుకుని రానుంది. వారికి మరింత అనుకూలంగా తీర్చిదిద్దుతోంది. కొత్తగా స్లీపర్ రైళ్లను అందుబాటులోకి తీసుకుని రావడానికి యుద్ధ ప్రాతిపదికన చర్యలు చేపట్టింది.

కాచిగూడ నుంచి బెంగళూరు (యశ్వంత్ పూర్) మధ్య రాకపోకలు సాగించే వందే భారత్ ఎక్స్ ప్రెస్ పై మరో తాజా సమాచారం వెలువడింది. ఈ ఎక్స్ ప్రెస్ కు కొత్తగా హిందూపురం హాల్ట్ సౌకర్యం లభించింది. ఈ విషయాన్ని రైల్వే శాఖ సహాయమంత్రి వీ సోమణ్ణ వెల్లడించారు. ప్రయాణికుల డిమాండ్ ను దృష్టిలో ఉంచుకుని ఈ నిర్ణయం తీసుకున్నట్లు చెప్పారు.

ఇకపై కాచిగూడ- యశ్వంత్ పూర్ వందే భారత్ ఎక్స్ ప్రెస్.. హిందూపురంలో ఆగుతుంది. ప్రస్తుతం ఈ రైలు అయిదు స్టేషన్లల్లో మాత్రమే హాల్ట్ అవుతున్న విషయం తెలిసిందే. కాచిగూడ నుంచి బయలుదేరిన తర్వాత మహబూబ్ నగర్, కర్నూలు సిటీ, అనంతపురం, ధర్మవరంలల్లో హాల్ట్ అవుతోంది. ఈ జాబితాలో కొత్తగా హిందూపురం కూడా వచ్చి చేరింది.

The long-standing demand for a stoppage of the Kacheguda-Bengaluru Vande Bharat Express at Hindupur has finally been approved.

This enhances connectivity to Sathya Sai Ashram, Puttaparthi, and benefits the region's manufacturing, pharmaceutical, automobile, and IT industries.…

— V. Somanna (@VSOMANNA_BJP) August 18, 2025

బుధవారం మినహాయించి ప్రతి రోజూ తెల్లవారు జామున 5:45 నిమిషాలకు కాచిగూడ నుంచి బయలుదేరే నంబర్ 20703 వందే భారత్.. మధ్యాహ్నం 2 గంటలకు యశ్వంత్ పూర్ కు చేరుకుంటుంది. మళ్లీ మధ్యాహ్నం 2:45 నిమిషాలకు యశ్వంత్ పూర్ నుంచి బయలుదేరే నంబర్ 20704 వందే భారత్.. రాత్రి 11 గంటలకు కాచిగూడకు చేరుకుంటుంది.

English summary

The long-standing demand for a stoppage of the Kacheguda-Bengaluru Vande Bharat Express at Hindupur has finally been approved.