"బీరు"తో పాటు బాటిల్ లోపలే స్టఫ్‌.. బిత్తరపోయిన మందుబాబు !!

తెలుగు రాష్ట్రాల్లో మార్చి మొదటి వారంలోనే భానుడు ప్రతాపం చూపిస్తున్నాడు. సెగలు గక్కుతున్న ఎండలు, ఉక్కపోతతో జనం అల్లాడిపోతున్నారు. ఈ వేసవి తాపం నుంచి ఉపశమనం పొందేందుకు మందుబాబులు అంతా బార్లు, వైన్ షాపుల వద్దకు క్యూ కడుతున్నారు. అయితే 'చిల్' బీర్లతో గొంతు తడుపుకుని కాస్త రిలాక్స్ అవుదామనుకున్న ఒక వ్యక్తికి మాత్రం ఊహించని షాక్ తగిలింది. తాను కొన్న బీర్ బాటిల్‌లో మందుతో పాటు 'మంచింగ్' కూడా ఫ్రీగా వచ్చిందని చూసి నోరెళ్లబెట్టాడు.

అసలేం జరిగిందంటే..

హైదరాబాద్‌లోని నాచారం పోలీస్ స్టేషన్ పరిధి మల్లాపూర్‌లో ఈ వింత ఘటన వెలుగుచూసింది. ఒక వ్యక్తి స్థానిక వైన్ షాపులో ఒక పాపులర్ బ్రాండెడ్ బీర్ బాటిల్‌ను కొనుగోలు చేశాడు. ఎండకు తట్టుకోలేక వెంటనే సీల్ తీసి గటగటా తాగేద్దామనుకున్నాడు. కానీ, సీల్ తీసే ముందే బాటిల్ లోపల ఏదో వింతగా కదులుతున్నట్లు గమనించాడు. తీరా నిశితంగా పరిశీలిస్తే.. అందులో ఒక చిన్న చేప పిల్ల ఈత కొడుతూ కనిపించింది.

వైన్ షాపులో కలకలం.. మిస్టరీ ఏంటి?

ఈ దృశ్యాన్ని చూసిన సదరు వ్యక్తి ఒక్కసారిగా అవాక్కయ్యాడు. వెంటనే బాటిల్‌ను షాపు నిర్వాహకులకు చూపించగా.. వారు కూడా ఇది చూసి షాక్‌కు గురయ్యారు. అక్కడికి వచ్చిన మిగతా మందుబాబులు "ఇదేం వెరైటీ రా బాబోయ్.. ఫిష్ బీర్ అని కొత్తగా లాంచ్ చేశారా?" అంటూ జోకులు పేల్చారు. అసలు బాటిల్ సీల్ చేసి ఉన్నాక, అందులోకి చేప పిల్ల ఎలా వచ్చింది? అనేది ఇప్పుడు పెద్ద మిస్టరీగా మారింది.

అయితే తయారీ లోపం వల్లే ఇలా జరిగిందని.. బీర్ తయారీ కేంద్రంలో బాటిళ్లను శుభ్రం చేసే సమయంలో వాడే నీటి ద్వారా చేప పిల్ల లోపలికి వెళ్లి ఉండవచ్చని భావిస్తున్నారు. వేల సంఖ్యలో బాటిళ్లు నింపే క్రమంలో క్వాలిటీ కంట్రోల్ టీమ్ ఈ బాటిల్ ని గమనించి ఉండకపోవచ్చని అనుకుంటున్నారు. ఆటోమేటిక్ మెషీన్ల ద్వారా బీర్ నింపేటప్పుడు జరిగిన పొరపాటే దీనికి కారణమని భావిస్తున్నారు.

సోషల్ మీడియాలో నెటిజన్ల కౌంటర్లు!

ఈ వింత ఘటనకు సంబంధించిన వీడియో ప్రస్తుతం నెట్టింట చెక్కర్లు కొడుతోంది. ఇది చూసిన నెటిజన్లు రకరకాలుగా స్పందిస్తున్నారు. "తాగేటప్పుడు సైడ్ డిష్ (నంజుకోవడానికి) చేపని కంపెనీ వాళ్లే ఫ్రీగా పంపినట్టున్నారు!" అని ఒకరు.. "హేయ్.. అది ఫిష్ మార్కెట్ కాదు భయ్యా.. బీర్ బాటిల్!" అని మరొకరు కామెంట్ చేస్తున్నారు. "మందు కొట్టే ముందు ఒక్కసారి బాటిల్ లోపల ఏముందో చెక్ చేసుకోండి మావా.. లేదంటే డైరెక్ట్ ఫిష్ ఫ్రై మింగేయాల్సి వస్తుంది" అంటూ హెచ్చరిస్తున్నారు. మరోవైపు కంపెనీల నిర్లక్ష్యంపై వినియోగదారులు మండిపడుతున్నారు.

English summary

This strange incident came to light in Mallapur under Nacharam police station limits in Hyderabad. The discovery of a live baby fish in a purchased by a man is causing a stir.