తెలంగాణ జరూర్ ఆనా:మిస్ వరల్డ్ పోటీలకు హైదరాబాద్ సర్వం సిద్ధం-పూర్తి షెడ్యూల్ ఇదే..!!

Updated: Monday, May 5, 2025, 13:37 [IST]

Miss World 2025:ప్రపంచ వ్యాప్తంగా ఎంతో ప్రతిష్టాత్మకంగా భావించే మిస్ వరల్డ్ అందాల పోటీలకు ఆతిథ్యం ఇవ్వడానికి హైదరాబాద్ నగరం సిద్ధమైంది. మే 31న 72వ ఎడిషన్ ఫైనల్స్ ఇక్కడ జరగనున్నాయి. విశ్వ సుందరీ పోటీల ద్వారా తెలంగాణ పర్యాటకాన్ని ప్రపంచానికి చూపించాలని రాష్ట్ర ప్రభుత్వం లక్ష్యంగా పెట్టుకుంది.ఈ మెగా ఈవెంట్ కు ముందు, రాష్ట్రంలో పలు హై-ప్రొఫైల్ కార్యక్రమాలను నిర్వహించనున్నారు. దీనికి సంబంధించిన పూర్తి షెడ్యూల్ ను తెలంగాణ సమాచార, పౌర సంబంధాల శాఖ విడుదల చేసింది. ఈ షెడ్యూల్ ప్రకారం... మిస్ వరల్డ్ పోటీదారులు పలు కీలక కార్యక్రమాల్లో పాల్గొననున్నారు.

ఇదీ షెడ్యూల్..!!

మే 21న ఉప్పల్ లోని రాజీవ్ గాంధీ అంతర్జాతీయ స్టేడియంలో జరిగే ఐపీఎల్ మ్యాచ్ ను వీక్షించే అవకాశం వీరికి దక్కనుంది.

మే 12న చారిత్రాత్మక చార్మినార్, లాడ్ బజార్ లలో హెరిటేజ్ వాక్ ఉంటుంది.

మే 13న చౌమహల్లా ప్యాలెస్ ను సందర్శిస్తారు.

మే 14న వరంగల్ ఫోర్ట్, వెయ్యి స్తంభాల గుడి, రామప్ప దేవాలయం వంటి చారిత్రక, పర్యాటక ప్రాంతాలను సందర్శించడంతో పాటు, పేరిణి నృత్య ప్రదర్శనను కూడా వీక్షించనున్నారు.ఇవే కాకుండా మరిన్ని కార్యక్రమాలు షెడ్యూల్ లో ఉన్నాయి.

global-glamour-in-hyderabad-72nd-miss-world-finale-preparations-and-itinerary

అంతర్జాతీయ అతిథులకు అదిరిపోయే స్వాగతం:ప్రపంచం నలుమూలల నుండి వచ్చే ప్రతినిధులకు స్వాగతం పలకడానికి శంషాబాద్ ఎయిర్‌పోర్ట్‌లో ప్రత్యేక ఏర్పాట్లు చేశారు.తెలంగాణ పర్యాటకం శాఖ ఆధ్వర్యంలో తెలంగాణ సంప్రదాయ పద్ధతిలో ఘన స్వాగతం లభించనుంది.ఇప్పటికే కొందరు రాగా,ఈ రోజు నుండి మరింత మంది అంతర్జాతీయ పోటీదారులు రానున్న నేపథ్యంలో,వారికి సహాయం చేయడానికి ఎయిర్‌పోర్ట్ లో ప్రత్యేక లాంజ్‌లు,హెల్ప్ డెస్క్‌లు ఏర్పాటు చేశారు.

తెలంగాణలోని పర్యాటక ఆకర్షణలు,సాంస్కృతిక చిహ్నాలను చూపిస్తూ స్వాగత తోరణాలను ఏర్పాటు చేశారు.పండుగ వాతావరణాన్ని సృష్టిస్తున్న ఈ ఏర్పాట్లలో,"తెలంగాణ జరూర్ ఆనా"(తప్పక తెలంగాణ రండి)అనే నినాదం పర్యాటకులను ఆకర్షించేలా పలు చోట్ల ప్రదర్శిస్తున్నారు.మిస్ వరల్డ్ వేదికను ఉపయోగించుకుని రాష్ట్ర పర్యాటకాన్ని మరింతగా ప్రోత్సహించాలని తెలంగాణ ప్రభుత్వం లక్ష్యంగా పెట్టుకుంది.2024లో రాష్ట్రానికి 1.5 లక్షలకు పైగా అంతర్జాతీయ పర్యాటకులు వచ్చారు.

పోటీ వివరాలు.. భారతదేశం ప్రాతినిధ్యం!
ఈ అందాల పోటీలు హైటెక్స్ ఎగ్జిబిషన్ సెంటర్ లో జరగనున్నాయి. 120 దేశాలకు పైగా పోటీదారులు ఇందులో పాల్గొంటారు. భారతదేశం వరుసగా రెండోసారి ఈ అంతర్జాతీయ అందాల పోటీలకు ఆతిథ్యం ఇవ్వడం విశేషం.

ప్రస్తుతం మిస్ వరల్డ్‌గా ఉన్న పోలాండ్‌కు చెందిన కరోలినా బీలవ్స్కా (Karolina Bielawska)గ్రాండ్ ఫినాలేలో తన వారసురాలికి కిరీటం అలంకరించనుంది.భారతదేశం తరపున ఫెమినా మిస్ ఇండియా వరల్డ్ 2023 నందిని గుప్తా (Nandini Gupta) పాల్గొంటున్నారు.మొత్తానికి, మిస్ వరల్డ్ ఈవెంట్‌తో హైదరాబాద్ ప్రపంచ పటంలో మరోసారి ప్రముఖంగా నిలవనుంది.విశ్వ సుందరీల రాకతో భాగ్యనగరం సందడిగా మారింది.