బిర్యానీ ఉడకలేదనడంతో గొడవ: కస్టమర్లపై దాడి చేసిన వెయిటర్లు, రాజా సింగ్ వార్నింగ్ (వీడియో)

హైదరాబాద్: నగరంలోని అబిడ్స్‌లో ఓ హోటల్​లో బిర్యానీ విషయమై తలెత్తిన గొడవ తీవ్ర ఉద్రిక్తతకు దారితీసింది. నూతన సంవత్సర సందర్భంగా ధూల్‌పేటకు చెందిన కొందరు యువతీయువకులు రాత్రి మటన్ బిర్యానీ ఆర్డర్ చేశారు. అయితే ​ బిర్యానీ సరిగా ఉండకలేదని, తాము పూర్తి డబ్బులు చెల్లించలేమని హోటల్ సిబ్బందికి చెప్పారు. అయితే దీనికి వారు అంగీకరించలేదు. దీంతో ఇరువర్గాల మధ్య ఉద్రిక్తత తలెత్తింది.

కస్టమర్లు వెయిటర్‌​పై దాడి చేయడంతో.. ఆ తర్వాత వెయిటర్లు, హోటల్ సిబ్బంది.. వినియోగదారులపై కర్రలు, కుర్చీలతో దాడికి దిగారు. ఈ క్రమంలో కొంతమంది వినియోగదారులకు గాయాలయ్యాయి. దీంతో వారిని ఉస్మానియా ఆసుపత్రికి పోలీసులు తరలించారు.

బాధితుల ఫిర్యాదు మేరకు హోటల్ యజమానిపై అబిడ్స్ పోలీసులు కేసు నమోదు చేసి, నలుగురు వెయిటర్లను అరెస్ట్ చేశారు. ఈ ఘటనపై గోషామహల్ ఎమ్మెల్యే రాజాసింగ్ స్పందించారు. అబిడ్స్ పోలీస్ స్టేషన్ ఇన్‌స్పెక్టర్‌తో ఫోన్లో మాట్లాడారు. ధూల్‌పేట మహిళలు, వ్యక్తులపై దాడి చేసిన వారిని కఠినంగా శిక్షించాలన్నారు.

On the night of December 31st , there was a fight in the Abids Grand Hotel,The hotel staff beat the customers with sticks.#Hyderabad pic.twitter.com/ofqzpITH2l

— Arbaaz The Great (@ArbaazTheGreat1) January 1, 2024

గ్రాండ్ హోటల్ హోటల్ యజమాని, సిబ్బందిపై కేసు నమోదు చేసి.. అరెస్ట్ చేయాలని కోరారు. లేనిపక్షంలో హోటల్‌పై దాడి చేస్తామని ఎమ్మెల్యే హెచ్చరించారు. మరోవైపు, యజమానిని అరెస్టు చేయాలంటూ అబిడ్స్​ పీఎస్​ ముందు ధూల్​‌పేట లోద్​ సమాజ్​ నాయకులు ఆందోళన చేపట్టారు.

English summary

Hyderabad: Clash in Abids Hotel over Biryani, case filed and staff arrested.