ఇంట్లో ఇద్దరికీ పెన్షన్ పక్కా.!సమస్యలు ఆలకిస్తూ,ప్రజలకు ధైర్యం కల్పిస్తూ కొనసాగుతున్న భట్టి యాత్ర.!

Published: Thursday, June 1, 2023, 16:56 [IST]

నాగర్ కర్నూల్/హైదరాబాద్: సీఎల్పీ నేత భట్టి విక్రమార్క చేపట్టిన పీపుల్స్ మార్చ్ పాదయాత్ర 77వ రోజు నాగర్ కర్నూలు జిల్లా అచ్చంపేట నియోజకవర్గం లింగాల మండలంలోని పలు గ్రామాల్లో కొనసాగుతోంది. గురువారం ఉదయం లింగాల మండలం అంబటిపల్లి నుంచి ప్రారంభమైన పాదయాత్ర ఆవుసలికుంట, లింగాల, నర్సాయిపల్లి క్రాస్ రోడ్ వరకు కొనసాగింది. ఈ సందర్భంగా దారి పొడవున ప్రజలను భట్టి విక్రమార్క కలుస్తూ వారి సమస్యలను అడిగి తెలుసుకున్నారు.

ఎర్రటి ఎండలో భట్టి యాత్ర : అవ‌స‌లికుంట గ్రామంలో భట్టి పాదయాత్రకు 43 డిగ్రీల ఎండ‌వేడిని లెక్కచేయకుండా ఆడబిడ్డలు బోనాలు ఎత్తుకొని ఎదురు వచ్చి ఘనంగా స్వాగతం పలికారు. తమ క‌ష్టాలు వింటాడని, తమకు భ‌రోసా, ధైర్యం ఇస్తాడని గ్రామ‌స్తులు, అక్క‌చెల్లెమ్మ‌లు పాదయాత్రలో కధం తొక్కారు. అంతేకాక డప్పు కళాకారులు, నిప్పులు కక్కే ఎండ‌లో, వాయిద్యాలతో దరువులేస్తూ జ‌న నాయ‌కుడికి స్వాగ‌తం ప‌లికారు. వారిని చూసి ఆనందంతోనూ.. ఇంత ఎండ‌లో తన కోసం నిల‌బ‌డ్డార‌ని ఒకింత బాధ‌ను భ‌ట్టి విక్ర‌మార్క వ్య‌క్తం చేశారు.

కాంగ్రెస్ వస్తేనే న్యాయం జరుగుతుంది : అంబటిపల్లి నుంచి ఆవుసలికుంట గ్రామానికి పాదయాత్రగా వస్తున్న విక్ర‌మార్క వ‌ద్ద‌కు శేఖ‌ర్ రెడ్డి, ఆనంద‌రెడ్డి రైతులు వ‌చ్చి త‌మ క‌ష్టాలు చెప్పుకున్నారు. తమ వ‌డ్లను 20 రోజుల నుంచి రోడ్ల‌మీద కుప్పులుగా పోశామని, ఇప్ప‌టి వ‌ర‌కూ కొనుగోలు కేంద్రాలు తెరువ‌లేదని, కొనుగోలు చేయ‌టంలేదని భట్టికి వివరించారు. తమ క‌ష్టాలు ఈ విధంగా ఉన్నాయని, ఆదుకోవాల‌ని భ‌ట్టి విక్ర‌మార్క‌ను రైతులు కోరారు. అంతా విన్న భ‌ట్టి విక్ర‌మార్క వ‌చ్చే ఇందిర‌మ్మ రాజ్యంలో తప్పకుండా మేలు చేస్తామ‌ని క‌ల్లాలోనే ధాన్యాన్ని కొనుగోలు చేయిస్తామ‌ని భ‌ట్టి విక్ర‌మార్క‌ హామీ ఇచ్చారు.

రేషన్ కార్డులు ఇస్తాం : పాద యాత్ర చేస్తున్న భట్టి విక్రమార్క వద్దకు వచ్చి ఆవుసలికుంట గ్రామ వాసి ఎలుగంటి చెన్నమ్మ తనకు ఇల్లు లేదని, రేకుల కొట్టం మీద ప్లాస్టిక్ కవర్లు కప్పుకుని కూలీకి పోయి బతుకుతున్నామని, రేషన్ కార్డు కూడా లేదని ఆవేదన వ్యక్తం చేసారు. ఏదైనా నాకు న్యాయం చేయండంటూ కన్నీళ్లతో భట్టి ని వేడుకున్నారు. ఇదే సమయంలో చెన్నమ్మ చిన్నకుమారుడు గౌతమ్ తో భట్టి విక్రమార్క కాసేపు ముచ్చటించాడు. వచ్చే ఇందిరమ్మ రాజ్యంలో.. ఇండ్లు ఇస్తామని, రేషన్ కార్డు ఇస్తామని హామీ ఇచ్చారు సీఎల్పీనేత భట్టి విక్రమార్క.

Published On June 1, 2023