భారీ అగ్నిప్రమాదం.. ఇద్దరు మహిళలు, చిన్నారి మృతి

రంగారెడ్డి జిల్లాలో విషాదం జరిగింది. నార్సింగి మండలం పుప్పాలగూడలో భారీ అగ్నిప్రమాదం చోటుచేసుకుంది. రెండస్తుల ఓ భవనంలో మంటలు చెలరేగి ఇద్దరు మహిళలు సహా ఓ చిన్నారి ప్రాణాలు కోల్పోయారు. ఘటనా స్థలాన్ని రాజేంద్రనగర్​ డీసీపీ శ్రీనివాస్​, నార్సింగ్​ ఏసీపీ రమణ గౌడ్​లు అక్కడకు చేరుకున్నారు.

ఏం జరిగిందంటే..?

రంగారెడ్డి జిల్లా నార్సింగి మండలం పుప్పాలగూడలోని ఓ రెండు అంతస్తుల భవనంలో గ్రౌండ్‌ ఫ్లోర్‌లో మంటలు చెలరేగాయి. దట్టమైన పొగ వ్యాపించడంతో ఊపిరాడక ముగ్గురు మృతిచెందారు. భవనంలో మంటలు చెలరేగిన విషయం తెలుసుకున్న లంగర్‌ హౌస్‌ అగ్నిమాపక సిబ్బంది వెంటనే అక్కడికి చేరుకొని సహాయక చర్యలు చేపట్టారు.

మొదటి అంతస్తులోని ఓ గదిలో చిక్కుకున్న ఇద్దరు మహిళలు, ఒక చిన్నారిని అత్యంత కష్టం మీద బయటకు తీసుకొచ్చారు.అపస్మారక స్థితిలో ఉన్నవారిని ఆస్పత్రికి తరలించారు.అయితే.. వారి ఆరోగ్య పరిస్థితి విషమించి ఆస్పత్రిలో చికిత్స పొందుతూ మృతిచెందినట్లు తెలుస్తోంది. మృతులను సిజిరా(7), సహానా(40), జమీలా(70)గా గుర్తించారు. అయితే, ఈ ప్రమాదం ఎలా జరిగింది? మంటలు ఎందుకు వ్యాపించాయనే వివరాలను పోలీసులు సేకరిస్తున్నారు. ప్రమాదం నుంచి మరో ఐదుగురిని కాపాడారు.భవనంలో మూడు గ్యాస్‌ సిలిండర్ల పేలడం వల్ల ప్రమాద తీవ్రత పెరిగింది.

"శుక్రవారం సాయంత్రం 5.45 గంటల ప్రాంతంలో.. నార్సింగి పోలీస్​ స్టేషన్​ పరిధిలోని పుప్పాలగూడ పాషా కాలనీలోని మిస్టర్​ ఉస్మాన్​ అనే వ్యక్తి ఇంట్లో అగ్నిప్రమాదం జరిగింది. ఆయన తన ఇంట్లో కిరాణా దుకాణం నిర్వహిస్తున్నారు. గ్రౌండ్​ ప్లోర్ లోని కిరాణా దుకాణంలో విద్యుత్​ షార్ట్​ సర్క్యూట్​ ప్రమాదానికి కారణం కావచ్చని ప్రాథమికంగా అంచనా వేస్తున్నాం" అని రాజేంద్రనగర్​ డీసీపీ చింతమనేని శ్రీనివాస్​ తెలిపారు.